काठमाडौँ । किताब जात्रा २०८१ को छैटौँ संस्करण आजदेखि सुरु भएको छ । दुई दिनसम्म चल्ने महोत्सवको उपप्रधान तथा अर्थमन्त्री विष्णु प्रसाद पौडेलले उद्घाटन गरेका हुन् ।

आर्मी अफिर्सस क्लब सुन्धारामा सुरु भएको महोत्सवमा कला, साहित्य, संस्कृतिका विभिन्न आयामहरूबारे छलफल हुने आयोजकले जनाएको छ । महोत्सवको पहिलो दिन दीपक सापकोटाको मध्यस्थतामा लेखकहरू अमर न्यौपाने, राधा पौडेल र विवेक ओझासँग सिर्जनामा सामाजिक चेतना: हिजो र आज नामको छलफल हुँदैछ ।

त्यस्तै, फिल्म निर्देशक मनोज पण्डितको मध्यस्थतामा दीपेन्द्र गौचन, प्रदीप भट्टराई र क्रृचा शर्मासँग सिनेमा मन्थनः नेपाली सिनेमाको सपना शीर्षकमा छलफल हुने आयोजकको भनाई छ । विप्लव प्रतीकको साथमा कविता साँझको पनि आयोजना हुँदैछ । त्यस्तै ओपन माइक सेसन अन्तर्गत महोत्सवमा सहभागीहरूले पनि आफ्नो सिर्जना सुनाउन सक्नेछन् ।

महोत्सवको दोस्रो तथा अन्तिम दिन स्टाटिङ अप विथ स्टार्ट अप्स् शीर्षकको प्यानल डिस्कसन हुनेछ । त्यस्तै, नेपाली साहित्यमा समीक्षकको उपस्थिति, मुलधारबाट सधैँ उपेक्षामा कला, हास्य विधा: शक्ति र चुनौती, सञ्चारका सारथि लगायतका विषयमा छलफल हुनेछ । दर्जनभन्दा बढी किताबका स्टलसँगै कलाका अन्य स्टलहरुले महोत्सवलाई आकर्षक बनाएको छ ।