काठमाडौं। स्पेनमा भीषण बाढीपछि अहिले स्थानीय जनतामा प्रशासनविरुद्ध आक्रोश छ । स्पेनको भ्यालेन्सियामा शनिबार क्षेत्रीय प्रमुखको राजीनामा माग गर्दै हजारौं स्थानीयले प्रदर्शन गरेका छन् ।
स्थानीयवासीले ‘हामी माटोले छोपिएका छौँ, तिमी रगतले छोपिएका छौ’ भन्ने नारा लगाएका थिए । अक्टोबरमा, भ्यालेन्सिया र छिमेकी प्रान्तहरूमा भीषण वर्षाका कारण आएको बाढीमा २०० भन्दा बढी व्यक्तिको मृत्यु भएको थियो। बाढीका कारण ८० जना अझै बेपत्ता छन् ।
स्थानीय अधिकारीहरूले बाढीको चेतावनी दिन ढिलो गरेको प्रदर्शनकारीहरूले आरोप लगाएका छन्। प्रदर्शनको अन्त्यमा आक्रोशित प्रदर्शनकारीको प्रहरीसँग झडप समेत भएको थियो ।
भ्यालेन्सियाका मेयर मारिया जोसे क्याटालाले सामाजिक सञ्जालमा भत्किएका झ्यालका तस्बिरहरू साझा गर्दै भने, “तोडफोड कुनै समाधान होइन।”
भ्यालेन्सिया सिटी काउन्सिलले पनि प्रदर्शनको क्रममा भएको तोडफोडको निन्दा गरेको छ।
