बहराइनको राष्ट्रिय फुटबल टोलीले इन्डोनेसियामा हुने विश्वकप छनोट खेल नखेल्ने बताएको छ । सुरक्षाको कारण देखाउँदै बहराइनले इन्डोनेसियामा फुटबल नखेल्ने बताएको बीबीसीले जनाएको छ ।
बहराइन फुटबल एसोसिएशनका अनुसार गएको हप्ता दुवै टोलीबीचको विवादास्पद २–२ गोलको बराबरीपछि इन्डोनेसियाका समर्थकहरूले बहराइनका खेलाडीलाई अनलाइनमार्फत मार्ने धम्की दिएका थिए ।
बहराइन र इन्डोनेसियाबीचको विश्वकप छनोट खेल अर्को वर्ष मार्चमा जकार्तामा हुने तालिका छ तर बहराइन फुटबल एसोसिएशनले फिफालाई खेल इन्डोनेसियाबाहिरको ठाउँमा सार्न आग्रह गरेको छ । यसबारेमा इन्डोनेसियाली फुटबल सङ्घ र फिफाले सार्वजनिक रूपमा टिप्पणी गरेका छैनन् ।
