काठमाडौं। भारतको सङ्घीय राजधानी दिल्लीमा अहिलेसम्मकै उच्च वायु प्रदूषण भएको छ । हावाको गुणस्तर मापन सूचक एक्यूआईलगातार १४ घण्टासम्म चार सयभन्दा माथि पुगेको बीबीसी हिन्दीले जनाएको छ ।
हिजो बेलुकादेखि आज बिहान ७ बजेसम्म हावाको गुणस्तर डर लाग्दो रहेको थियो । दिल्लीको केही ठाउँमा छोटो समय एक्यूआई पाँच सय ३३ सम्म पुगेको थियो । एक्यूआई तीन सयभन्दा माथि पुग्नुलाई अत्यन्तै अस्वस्थकर अर्थात घातक मानिन्छ ।
दिल्लीमा यस अघि पनि पटक पटक एक्यूआई चार सयभन्दा माथि पुग्ने गरेकोमा हिजो लामो समयसम्म चार सयभन्दा माथि रहेको हो । यसबेला हरियाणा, पञ्जाबलगायत राज्यका खेतमा पराल जलाउने काम भइरहेकोले दिल्लीको वायु प्रदुषण बढेको छ ।
यस्तै हिजो दिपावलीमा पटका पड्काएका कारण वायु प्रदूषण अत्यधिक बढाएको हो । सरकारले दिल्लीमा पटका पड्काउन प्रतिबन्ध लगाएको भए पनि जथाभावी पड्काउने काम भइरहेको छ । दिल्लीको आकाशमा वारुदको धुवाँले ढाकिएको बीबीसी हिन्दीले जनाएको छ । अहिले पनि दिल्लीमा एक्यूआइ तीन सय आसपासमै रहेको छ ।
