काठमाडौं। अमेरिकी नवनिर्वाचित राष्ट्रपति डनल्ड ट्रम्पले चुनावी वाचा तत्काल पुरा गर्ने प्रतिवद्धता जनाएका छन् । उनले अवैध आप्रवासीलाई उनीहरुकै देशमा फिर्ता गर्ने र सीमालाई थप बलियो बनाउने विषय मुख्य प्राथमिकतामा रहेको पनि बताए ।

एनबीसी न्यूजमा एक अन्तर्वाता दिँदै ट्रम्पले अमेरिकी मतदातालाई आफूले गरेको वाचा अनुसार आफ्नो कार्यकालको सबैभन्दा मुख्य विषय अवैध आप्रवासीलाई डिपोर्ट गर्ने रहेको स्पष्ट पारे ।

साथै उनले जनवरीमा पदभार ग्रहण गरेपछि आफ्नो प्राथमिकताहरू मध्ये एक अमेरिकी सीमालाई बलियो र शक्तिशाली बनाउनु आवश्यक रहेको पनि बताए । ट्रम्पको उक्त कदमले अमेरिकी इतिहासमा सबैभन्दा ठूलो निर्वासनको प्रयास हुने बताइएको छ । अवैध आप्रवासीलाई अमेरिकाबाट फिर्ता पठाउनुबाहेक आफूसँग अन्य कुनै विकल्प नरहेको उनले जीकिर गरे । उनले अवैध आप्रवासीले हत्या हिंसा बढेको र लागूऔषध कारोवारीहरुले अमेरिकालाई नस्ष्ट गरिरहेको कारण उक्त कदम चाल्न आवश्यक रहेको प्रष्ट पारे ।

मंगलबार भएको निर्वाचनमा डेमोक्रर्याटकी कमला ह्यारिसलाई हराउँदै ट्रम्प विजयी भएका छन् । विजयी भएसँगै ट्रम्पले ह्वाइट हाउसका कर्मचारीको प्रमुखमा सुसी विल्सलाई नियुक्त गरिसकेका छन् । वाइल्स ट्रम्पको चुनावी अभियानका वरिष्ठ सल्लाहकार थिए ।