काठमाडौंको कीर्तिपुर नगरपालिकाकी कार्यवाहक मेयर शुभलक्ष्मी शाक्यको कार्यकक्षमा एकजना वडाध्यक्षले तोडफोड गरेका छन् । वडा नम्बर ३ का वडाध्यक्ष सुविन्द्र महर्जनले कार्यवाहक मेयरको कार्यकक्षमा तोडफोड गरेका हुन् । कार्यवाहक मेयर शाक्य र वडाध्यक्षहरूबीच सचिवालयमा छलफल भइरहेका बेला वडाध्यक्ष महर्जनले तोडफोड गरेका हुन् । वडाध्यक्ष महर्जनले प्रमुख प्रशासकीय अधिकृतसँग भेट्न खोज्दा समय नदिएको भन्दै टेबलमा प्रहार गरेका थिए । वडाध्यक्ष महर्जनले टेबलमा प्रहार हान्दा सिसा फुटेर छरिएको छ ।

कार्यवाहक मेयर शाक्यले पनि वडाध्यक्षले तोडफोड गरेको जानकारी दिएकी छन् । मेयर राजकुमार नकर्मीको निधन भएपछि शुभलक्ष्मीले कार्यवाहक मेयरको जिम्मेवारी सम्हाल्दै आएकी छन् । मेयर पदका लागि मंसिर १६ गते मतदान हने तालिका छ । त्यसका लागि आइतबार उम्मेदवारी मनोनयन भइसकेको छ ।