प्रतिनिधिसभाका सचिव सुरेश अधिकारीको राजीनामा स्वीकृत भएको छ । राष्ट्रपति रामचन्द्र पौडेलले उनको राजीनामा आइतबार स्वीकृत गरेका हुन् । सभमुख देवराज घिमिरे कम्बोडियामा रहेको समयमा प्रतिनिधि सभाका सचिव सुरेश अधिकारीले राजीनामा दिएका थिए । सभामुख घिमिरे कम्बोडिया भ्रमणमा रहेको बेला अचानक सचिव अधिकारीले किन राजीनामा दिए भन्ने खुलेको छैन । तर उनले स्वास्थ्यलाई कारण देखाएका छन् । उनलाई गत जेठ १८ गते प्रतिनिधि सभाको सचिवमा नियुक्त गरिएको थियो । राष्ट्रपति रामचन्द्र पौडेलले संविधानको धारा १०६ को उपधारा ९१० बमोजिम प्रतिनिधि सभाको सचिवमा अधिकारीलाई नियुक्त गरेका थिए । पद्मप्रसाद पाण्डेय संघीय संसद्‍को महासचिव भएपछि रिक्त सचिव पदमा उनी नियुक्त भएका थिए । उनलाई तत्कालीन भागबन्डाका क्रममा कांग्रसको कोटाबाट सचिव बनाइएको थियो । वर्तमान महासचिव पाण्डेयलाई भने एमालेको जोडबलमा अघि बढाइएको थियो ।