काठमाडौं। नेपाल प्रिमियर लिग (एनपीएल) क्रिकेटको टोली सुदूरपश्चिम रोयल्समा अनुबन्ध भएका स्कटल्यान्डका ब्रान्डन मक्मलेन नेपाल आइपुगेका छन् । उनलाई त्रिभुवन अन्तर्राष्ट्रिय विमानस्थलमा सुदूरपश्चिम रोयल्सका प्रतिनिधिले स्वागत गरेका थिए ।
२५ वर्षीय ब्याटिङ अलराउन्डर मक्मलेनले १६ टी–२० अन्तर्राष्ट्रिय क्रिकेटमा ६ अर्धशतकसहित १ सय ४८ को स्ट्राइक रेटमा ४ सय ९७ रन बनाएका छन् ।
भोलिदेखि शुरू हुने पहिलो संस्करणको प्रतियोगिताका लागि विदेशी खेलाडी धमाधम नेपाल आइरहेका छन् । उद्घाटन खेलमा भोलि दिउँसो १२ बजे विराटनगर किङ्ग्स र जनकपुर बोल्ट्स खेल्दैछन् ।
एनपीएलमा विराटनगर, जनकपुरसहित चितवन राइनोज, काठमाण्डौ गुर्खाज, पोखरा एभेन्जर्स, लुम्बिनी लायन्स, कर्णाली याक्स र सुदूरपश्चिम रोयल्स गरी आठ वटा टोली सहभागी छन् ।
