काठमाडौं। नेपाल प्रिमियर लिग (एनपीएल)को आफ्नो दोस्रो खेलमा अहिले पोखरा एभेन्जर्सले जनकुपर बोल्ट्को सामना गरिरहेको छ । टस जितेको जनकपुरले पोखरालाई पहिले ब्याटिङको निम्तो दिएको थियो ।
पोखराले निर्धारित २० ओभरमा सात विकेट गुमाएर एक सय ३८ रन बनाएपछि जनकपुरले एक सय ३९ रनको लक्ष्य पाएको छ । पोखराले ओपनिङमा दिनेश खरेल र एन्ड्रिस गउसलाई पठाए पनि उनीहरू लामो समय मैदानमा टिकेर खेल्न सकेनन् । दिनेश १० र गउस २० रनमा आउट भए ।
टी–२० विश्वकपमा अमेरिकाको लागि र क्यारेबियन प्रिमियर लिगमा पनि उत्कृष्ट प्रदर्शन गरेका गउसको लागि एनपीएलको पहिलो खेल राम्रो रहेन । क्लबका कप्तान कुशल भुर्तेल ६ रनमा आउट भएपछि पोखराले ४५ रन बनाएर तेस्रा विकेट गुमायो । १० ओभरको समाप्तिमा तीन विकेट गुमाएको पोखराले ७० रन बनाएको थियो ।
११ रन बनाएका दिलिप नाथलाई मोहम्मद होसेनले एलबीडब्ल्यू धरापमा पारे । मार्कस क्रिचली ३० रन बनाएर आउट भए । उनलाई ललितले नै अनिल शाहबाट क्याच गराएका हुन् । राइमन रेइन्फर १७ रनमा आउट भए । माइकल लिस्कले १३ बलमा २५ रन बनाएपछि पोखराले खेलमा मध्यम लक्ष्य प्रस्तुत गरेको हो ।
जनकपुरका ललितले तीन विकेट लिए भने जेम्स नीशमले दुई विकेट लिए । किशोर महतो र होसेनले एक–एक विकेट आफ्नो नाम गरे ।
