सोलुखुम्बुको लिखु पिके गाउँपालिकामा निर्माण हुन लागेको ७७ मेघावाट क्षमताको हाईड्रोपावरले वस्ती नै जोखिममा परेको छ । गाउँपालिकाको वडा नं. ५मा सञ्चालित हाईड्रोपावर परीक्षणको समयमा पानी लिकेज भएर वस्ती जोखिममा परेको हो । एमभी दुगर ग्रुपद्धारा सञ्चालित पान हिमालय ईनर्जी प्रालीले सोही क्षेत्रमा हाईड्रोपावर निर्माण गर्न लागेको छ ।
मंगलवार हाईड्रोपावरको टनेल परीक्षण गर्ने क्रममा पानी लिकेज भएको हो । पानी लिकेज हुँदा गाउँपालिकाको पाताल छिरिङ्खर्क र मार्बु वस्तीको करिब ७० वटा घर जोखिममा परेका छन् । वस्तीमा पानी पर्न थालेपछि स्थानीय त्रसित भएका हुन् ।
मंगलवार हाईड्रोपावरबाट पानी लिकेज भएर वस्तीमा पसेपछि गाउँपालिकाको कार्यपालिका वैठकले तत्कालका लागि काम रोक्न ताकेता गरेको छ । स्थानीयको आग्रहपछि गाउँपालिकाकी अध्यक्ष मिना कार्की वस्नेत सहित जनप्रतिनिधिहरु मंगलवार नै हाईड्रोपावरको निरीक्षणका लागि पुगेका थिए । स्थानीय आग्रह र जोखिमलाई मुल्याङ्कन गरी हाईड्रोपावरको काम तत्कालका लागि रोक्ने निर्णय गरेको लिखुपिके गाउँपालिका अध्यक्ष मिना कार्की बस्नेतले बताउनुभयो ।
लिखु पिके गाउँपालिकामा ग्लोबल र नुम्मुर हिमालय हाईड्रोपावर समेत सञ्चालनमा छन् । हाईड्रोपावर सञ्चालनको लामो समयसम्म पनि कम्पनीले सामाजिक उत्तरदायित्व अन्तर्गत गर्नुपर्ने कुनैपनि काम नगरेको भन्दै स्थानीयले आरोप लगाउँदै आएका छन् । यस्ता असन्तुष्टिका विच गाउँपालिकामा दुगर ग्रुपले हाईड्रोपावर सञ्चालन गर्न लागेको हो । स्थानीयले भने सुरक्षाको ख्याल गर्दै हाईड्रोपावरका आयोजनाहरु अघी बढाउन माग गरेका छन् ।
