काठमाडौं। प्रतिनिधिसभाअन्तर्गतको अन्तर्राष्ट्रिय सम्बन्ध तथा पर्यटन समितिका सभापति राजकिशोर यादव र नेपाल मजदुर किसान पार्टीका सांसद प्रेम सुवालबीच बैठक हलमै भनाभन भएको छ ।
बिहीबार सिंहदरबारमा बसेको समिति बैठकमा निर्णय सुनाउने क्रममा आफ्नो असहमतिलाई सभापतिले बेवास्ता गरेको भन्दै सांसद सुवालले प्रश्न उठाएपछि सभापति यादव आक्रोशित भएका थिए । त्यसपछि पूर्वप्रधानमन्त्री माधवकुमार नेपालसमेत उपस्थित बैठकमा दुईजनाबीच चर्काचर्की भएको हो ।
सांसद सुवालले आफ्नो असहमति राख्दै गर्दा सभापति यादवले अमर्यादित ढंगले नौटंकी गर्ने भन्दै सुवाललाई हप्काएका थिए ।
नेपाल वायु सेवा निगमको विमान सञ्चालन व्यवस्थापन तथा सेवा सञ्चालनका सम्बन्धमा छलफलपछि निर्णय गर्ने क्रममा समितिमा उपस्थित नभएका सांसदको संयोजकत्वमा उपसमिति बनाइएको भन्दै सांसद सुवालले असहमति जनाएका थिए ।
यसअघि पनि माओवादी सांसद सुदन किराती , सांसद सुवाललगायतसँग पनि समितिमा सभापति यादवको भनाभन भएको थियो ।
‘सहमति छैन भनेपछि पनि पेलेर चलाउने, कुरा सुन्दै नसुनी निर्णय लिने ? राणा शासन होइन यो, तपाईं राणाको अवतार नलिनुस्’, सुवालले सभापति यादवलाई भने, ‘मैले असहमति छ भनिसकेपछि किन बोल्न नदिने ? राणा शासन जसरी समाप्त भयो त्यसैगरी तपाईं पनि सिद्धिन्छ । तपाईंलाई मैले भनिसकेपछि, मेरो आपत्ति छ भनेपछि मलाई सोध्नु पर्दैन ? निरंकुश बन्ने ? राणा शासन चलाउने ? तपाईं सत्ताधारी पार्टीको पुच्छर नबन्नुस् ।’
सुवालले यसो भनिरहँदा यादव पनि बढ्दा बोल्ने भन्दै उठेर जंगिएका थिए । यादवको छेउमा माधव नेपाल चुपचाप बसिरहे । यता सुवाललाई पनि अर्का सांसदले रोक्न खोजे तर उनी रोकिएनन् यादवमाथि जाइलागिरहे ।
‘तपाईं निरंकुश नबन्नुस् । निरंकुश भयो भने सिद्धिन्छ । दाँत छिट्टै किराले खान्छ तर जिब्रोलाई केही हुँदैन, होस् गर्नुस्’, सुवालले भने, ‘अनुपस्थित सदस्यको संयोजकत्वमा समिति बनाउन पाइन्छ ? समितिका सदस्यहरूको राय लिनुपर्दैन राय लिनुपर्छ । निरंकुश नबन्नुस् तपाईं ।’
यादवले पनि सुवाललाई धेरै बाठो नहु्नु भन्दै उठेर थर्काए । तर सुवालको स्वर झन् चर्कियो । ‘सभापतिजी तपाईं बढ्ता नहुनुस्, नभएको सांसदको संयोजकत्वमा समिति नबनाउनुस् । तपाईं निरंकुश भयो भने सिद्धिन्छ’, उनले एकै कुरा दोहोर्याइरहे, ‘कुन दिन सिद्धिन्छ यो सभापति अनि थाहा पाउँछ ।’
