काठमाडौं। विभागीय टोली नेपाल पुलिस क्लबले जय ट्रफी पुरुष एलिट कपमा मधेश प्रदेशविरुद्ध एक इनिङ र ३५ रनको सानदार जित हात पारेको छ । वीरगन्जस्थित नरायाणी क्रिकेट मैदानमा दोस्रो तथा अन्तिम दिनको दोस्रो सेसनमै मधेशलाई ९४ रनमा अलआउट गर्दै पुलिसले सानदार जित हात पारेको हो ।
पहिलो दिन पुलिसले टस जितेर फिल्डिङ रोजेपछि सुरुवाती ब्याटिङ गरेको मधेशले एक सय २९ रन जोड्दा सबै विकेट गुमाएको थियो । मधेशका लागि मयन यादवले ५९ रनको योगदान दिएका थिए भने पुलिसका गुल्सन झाले ५ विकेट लिएका थिए । पुलिसले ३ विकेट गुमाएर १ सय ७४ रन बनाएको अवस्थाबाट दोस्रो दिनको खेल सुरु गरेको थियो ।
पुलिसले थप ८४ रन जोड्दा एक विकेट गुमाएर इनिङ समाप्तिको घोषणा गरेको थियो । पहिलो इनिङमा ५९ ओभर ब्याटिङ गर्दै ४ विकेट गुमाएर २ सय ५८ रन बनाएको पुलिसले १ सय २९ रनको अग्रता लिएको थियो । उसका लागि दिलिप नाथले ४० र कुशल भुर्तेलले ६३ रनको अर्धशतकीय योगदान दिएका थिए । अमित श्रेष्ठ ६५ रनमा बाहिरिए । गुल्सन झा २० रनमा आउट हुँदा अर्जुन साउद २२ रनमा रिटायर्ड हर्ट भएका थिए ।
कप्तान आरिफ शेख ४० र शंकर राना ३१ रनमा अविजित रहँदा पुलिसले इनिङ घोषणा गरेको थियो । मधेशका हरिशंकर साहले २ विकेट लिए ।
एक सय २९ रनले पछि परेको अवस्थाबाट दोस्रो इनिङ थालेको मधेशले ३२ ओभर २ बलमा सबै विकेट गुमाएर ९४ मात्र बनाउन सक्यो । मधेशका लागि विशाल पटेलले २७, मायन यादवले २२ र हिमांशु दत्तले १७ रन बनाए । अन्य ब्याटरले दोहोरो अंकमा रन बनाउन सकेनन् ।
पुलिसका लागि कुशल भुर्तेलले पाँच, गुल्शनकुमार झाले तीन तथा ललितनारायण राजवंशीले दुई विकेट लिए । पहिलो दिनको पहिलो सत्रमा मात्र पुलिसलाई केही चुनौती दिएको मधेश खेलको बाँकी अवधि भर दबाबमा थियो । जितसँगै पुलिस ४० अंक जाडेर लिगको शीर्ष स्थानमा उक्लिएको छ । लिग चरणको अन्तिम खेलमा पुलिसले बागमती र मधेशले आर्मीको सामना गर्नेछन् ।
