काठमाडौं। भारतको महाराष्ट्रमा रेल दुर्घटना हुँदा तीन जना नेपाली सहित १३ जनाको मृत्यु भएको छ । उत्तरप्रदेशको लखनउबाट मुम्बइतर्फ गइरहेको पुष्पक एक्सप्रेसको रेलको एउटा डब्बामा आगो लागेको झुटो हल्ला फैलिएपछि आत्तिएका यात्रुहरू हामफाल्दा विपरीत दिशाबाट आइरहेको कर्नाटक एक्सप्रेसले उनीहरूलाई किचेको थियो ।
सो दुर्घटनामा अन्य १० जना घाइते भएका छन् भने चार जनाको अवस्था गम्भीर रहेको भारतीय सञ्चारमाध्यमहरूले जनाएका छन् ।
उक्त घटनामा तीन जना नेपालीको पनि ज्यान गएको छ । मृतक नेपालीहरूमा लछिराम पासी, कमला नविन भण्डारी र नन्दराम विश्वकर्मा रहेको भारतीय पत्रिका दैनिक भास्करले जनाएको छ ।
उत्तर महाराष्ट्रको जलगाउँ जिल्लामा बुधबार साँझ उक्त दुर्घटना भएको हो । घटनास्थल मुम्बईबाट चार सय किलोमिटरको दूरीमा रहेको जनाइएको छ ।
