अन्तर्राष्ट्रिय मानव अधिकारवादी संस्था ह्युमन राइट्स वाचले बंगलादेशको अन्तरिम सरकारलाई कानुन कार्यान्वयनमा निष्पक्षता अपनाउन आग्रह गरेको छ । ह्युमन राइट्स वाचले एक विज्ञप्ति जारी गर्दै बंगलादेशको अन्तरिम सरकारलाई यस्तो आग्रह गरेको हो ।
संयुक्त राष्ट्रसंघको प्रतिवेदनमा बंगलादेशमा राजनीतिक स्वार्थप्रेरित हिंसाका घटना बढिरहेको उल्लेख रहेको भन्दै यसको समाधान गर्न पनि उक्त संस्थाले आग्रह गरेको छ । त्यसबाहेक बंगलादेशमा गैरन्यायिक हत्या, यातना र सामूहिक धरपकडजस्ता घटना पनि भइरहेको उक्त प्रतिवेदनमा उल्लेख गरिएको छ ।
गत वर्षको अगस्ट महिनामा भएको आन्दोलनसँगै तत्कालीन प्रधानमन्त्री शेख हसिनाले पद त्यागेपछि बंगलादेशमा अन्तरिम सरकारले शासन चलाइरहेको छ ।
नोबेल पुरस्कार विजेता मोहम्मद युनुसको नेतृत्वमा अन्तरिम सरकारले सत्ता सम्हालेसँगै बंगलादेशमा अल्पसङ्ख्यक र हसिनाको पार्टीका कार्यकर्तामाथि हिंसात्मक आक्रमणका घटना बढिरहेको बताइएको छ ।
हालै त्यहाँको सेनाले अपरेसन डेभिल हन्ट नामक सैन्य कारबाही चलाएको छ । उक्त सैन्य अभियानका क्रममा हसिनाको अवामी लिग पार्टीप्रति आस्था राख्ने २ हजार जनाभन्दा धेरैलाई पक्राउ गरिएको जनाइएको छ ।
