काठमाडौं। मन्त्रालयहरूले आफैँले तय गरेको चालु आर्थिक वर्षको पुस महिनासम्मको माइलस्टोनमा भौतिक पूर्वाधार तथा यातायात मन्त्री देवेन्द्र दाहाल पूर्णतः असफल भएका छन् । त्यस्तै, स्वयं मन्त्रालयहरूले नै तय गरेको माइलस्टोनमा पुस महिनासम्मको प्रगतिमा प्रधानमन्त्री ओली सहित १२ वटा मन्त्रालयले ५० प्रतिशत अंक कटाउन सकेका छैनन् ।
प्रधानमन्त्री तथा मन्त्रिपरिषद्को कार्यालयले सार्वजनिक गरेको चालु आर्थिक वर्षको पुस महिनासम्मको प्रगति विवरणमध्ये माइलस्टोनको अर्धवार्षिक प्रगतिमा भौतिक पूर्वाधार तथा यातायात मन्त्रालयले १५.८ प्रतिशत मात्रै प्रगति गरेको देखाइएको छ । सो मन्त्रालयले पुस महिनासम्म सम्पन्न गर्नैपर्ने भनेर १९ वटा कार्यक्रम तय गरिएकोमा सो अवधिसम्म जम्मा ३ वटा मात्र काम सम्पन्न गरेको छ ।
माइलस्टोन प्रगति तथ्यांकअनुसार महिला बालबालिका मन्त्रालयले पुस महिनासम्म सम्पन्न गर्नुपर्ने कार्यक्रम १४ वटा तय गरिएकोमा ३ वटा र श्रम, रोजगार तथा सामाजिक सुरक्षा मन्त्रालयले पुस महिनासम्म सम्पन्न गर्नुपर्ने कार्यक्रम २० वटा तय गरिएकोमा ५ वटा मात्रै सम्पन्न गरेको छ ।
माइलस्टोन प्रगतिमा प्रधानमन्त्री तथा मन्त्रीपरिषद् कार्यालयले आफैँले तय गरेको पुस महिनासम्मको माइलस्टोनमा ४३.२ प्रतिशत मात्रै प्रगति हासिल गरेको छ । सो कार्यालयले पुस महिनासम्म ४४ वटा विभिन्न कार्यक्रम सम्पन्न गर्नै पर्ने लक्ष्य तय गरेकोमा जम्मा १९ वटा मात्रै सम्पन्न गरेको हो ।
त्यस्तै, समीक्षा अवधिमा तय गरिएको माइलस्टोनमा अर्थ, खानेपानी, उद्योग, वाणिज्य तथा आपूर्ति, शिक्षा, विज्ञान तथा प्रविधि, परराष्ट्र, वन तथा वातावरण, सहरी विकास, युवा तथा खेलकुद र श्रम, रोजगार तथा सामाजिक सुरक्षा मन्त्रालयले ५० प्रतिशत भन्दा कम अंक प्राप्त गरेका छन् ।
प्रधानमन्त्री कार्यालय सहित विभिन्न मन्त्रालय तथा कार्यालयहरूको माइलस्टोन प्रगति विवरण
