काठमाडौं- ठमेलमा दुईजना प्रहरीलाई कुटपिट अभियोगमा पक्राउ परेका नेकपा (एमाले) निकट विद्यार्थी संगठन अनेरास्ववियुका नेताहरूलाई काठमाडौं जिल्ला अदालतले सोमबार धरौटीमा छाड्ने आदेश दिएको छ ।
न्यायाधीश हर्कबहादुर केसीको इजलासले दुईजना प्रहरीलाई कुटपिट गरेको प्रकरणमा पक्राउ परेका पाँचैजना विद्यार्थी नेतालाई धरौटीमा छाड्ने आदेश दिएको हो ।
पक्राउ परेका रमेश फुलारालाई १५ हजार रुपैयाँ धरौटी मागिएको छ । कमलराज जोशी, गोपालबहादुर शाही, नवीनसिंह ऐर र दिनेश सिग्देललाई जनही १०/१० हजार धरौटीमा छाड्न आदेश भएको छ ।
जोशी अनेरास्ववियुका स्थायी कमिटी सदस्य तथा अमृत साइन्स क्याम्पस (अस्कल) इकाइका पूर्वअध्यक्ष पनि हुन् । उनीहरूले प्रहरी वृत्त, दरबारमार्गअन्तर्गत केशरमहल बिटबाट खटिएका प्रहरी हवल्दार जगुलाल घर्ती र जवान नगेन्द्रराज विष्टलाई गत माघ २४ गते राति कुटपिट गरी घाइते बनाएका थिए ।
मध्यराति मदिराले लठ्ठिएर हो-हल्ला गर्दै हिँडेका उनीहरूलाई प्रहरीद्वयले सम्झाउन खोज्दा आक्रमण गरेका थिए । दुवै प्रहरीलाई लात्ती मुक्का बर्साएपछि यी नेताले टोपी र लाठी पनि फ्याँकिदिएका थिए ।
अनेरास्ववियुका नेताहरूको कुटपिटबाट घाइते हवल्दार घर्तीको राष्ट्रिय ट्रमा सेन्टरमा उपचार गरिएको थियो । घर्तीको टाउकोसहित शरीरका विभिन्न भागमा चोट थियो । जवान विष्टको आँखा र शरीरका अन्य भागमा चोट लागेर घाइते भएका थिए ।
