दोलखा– जिल्लाको बैतेश्वर गाउँपालिका–६ बुस्टिस्थित तामाकोशी–मन्थली खड्काखण्डमा आइतबार बिहान मोटरसाइकल दुर्घटना हुँदा एक जनाको मृत्यु भएको छ भने अर्का घाइते भएका छन् ।

आइतबार बिहान करिब ९ बजे तामाकोशीबाट मन्थलीतर्फ जाँदै गरेको बा ५२ प ४२९३ नम्बरको मोटरसाइकल अनियन्त्रित भई करिब २०–२५ मिटर तल तामाकोसी नदी किनार नजिकै बगरमा खसेको जिल्ला प्रहरी कार्यालय दोलखाले जनाएको छ ।

दुर्घटनापछि प्रहरीले मोटरसाइकलमा सवार दुवै जनालाई उद्धार गरी पशुपति चौलागाई स्मृति अस्पताल चरिकोट पठाइएको थियो । अस्पतालमा उपचारका क्रममा बैतेश्वर गाउँपालिका–१ गैरीमुदीका ३० वर्षीय अंकितराज उप्रेतीको मृत्यु भएको अस्पतालका चिकित्सकले पुष्टि गरेको प्रहरीले जनाएको छ । मोटरसाइकल पछाडि सवार मेलुङ गाउँपालिका–१ पोवटीका ३० वर्षीय दोर्जे लामा घाइते भएका छन् । उनको बायाँ घुँडा र गर्दनमा चोट लागेको, अवस्था मध्यम रहेको र बोल्न सक्ने अवस्थामा रहेको प्रहरीले जनाएको छ।

दुर्घटनामा संलग्न मोटरसाइकल प्रहरीले नियन्त्रणमा लिएको छ । दुर्घटना स्थल प्रहरी चौकी किराँतीछापबाट करिब ९ किलोमिटर दक्षिणपूर्व दूरीमा पर्ने प्रहरीले जनाएको छ। सुवाश बस्नेत/दोलखा