वीरगञ्ज नाका हुँदै चालू आर्थिक वर्षको ११ महिनामा एक अर्ब ८४ करोड २३ लाख रुपैयाँ मूल्य पर्ने साना–ठूला दुई हजार तीन सय ८५ विद्युतीय गाडी आयात भएका छन् । वीरगञ्ज भन्सार कार्यालयले चालू आवमा विद्युतीय गाडीकोे आयातबाट एक अर्ब ८४ करोड २७ लाख रुपैयाँ राजस्व सङ्कलन गरेको जनाएको छ ।

वीरगञ्ज भन्सार कार्यालयका प्रमुख भन्सार प्रशासक दीपक लामिछानेले चालू आवमा विद्युतीय गाडीको आयात बढेको बताउनुभयो । चालू आवको ११ महिनामा ५० किलोवाट क्षमताका २७ करोड ११ लाख रुपैयाँ मूल्यका एक सय ९३ वटा विद्युतीय जीप, कार र भ्यान आयात भएका छन् । त्यस्तै गरी यही अवधिमा ५१ किलोवाटदेखि एक सय किलोवाट क्षमताका १३ करोड ४२ लाख रुपैयाँ मूल्य पर्ने ५० वटा विद्युतीय जीप, कार र भ्यान आयात भएको छ ।

त्यस्तै एक सय एक किलोवाटदेखि दुई सय किलोवाट क्षमताका २४ करोड ७५ लाख रुपैयाँ मूल्यका ३६ वटा विद्युतीय जीप, कार र भ्यान आयात भएका छन् । यो नाका हुँदै ४० करोड ७८ लाख रुपैयाँ मूल्य पर्ने एक हजार सात सय एक वटा विद्युतीय मोटरसाइकल आयात भएको छ ।