म्यानमारमा शक्तिशाली भूकम्प गएर जनजीवन तहसनहस भएको बेलामा पनि सैन्य सरकारले हवाई आक्रमण जारी राखेको छ । भूकम्प गएको तीन घण्टा नपुग्दै सेनाले गरेको हवाई आक्रमणमा सात जनाको ज्यान गएको बीबीसीले जनाएको छ ।
सेनाले अहिले पनि आक्रमण रोकेको छैन । भूकम्पको केन्द्र सागाइङ्गको चाङ्ग–यू टाउनशिपसहित अरू ठाउँमा सेनाले आक्रमण गरेको बीबीसीको खबरमा उल्लेख छ ।
सन् २०२१ मा सत्ता कब्जा गरेको म्यान्मारको सैनिक सरकार जुन्ताले चार वर्षदेखि चलिरहेको गृहयुद्धका कारण देशको धेरै हिस्सामाथि नियन्त्रण गुमाइसकेको छ । त्यहाँ विद्रोही समूह र भ्रष्टाचार विरोधी समूह सेनासँग युद्धरत अवस्थामा छन् ।
यसैबीच भूकम्पका कारण ज्यान गुमाउनेको सङ्ख्या एक हजार ६ सय ४४ जना पुगेको छ । तीन हजार चार सय आठ जना घाइते भएका छन् । एक सय ३९ जना बेपत्ता रहेका जानकारी दिइएको छ ।
अहिले पनि स्थानीय बासिन्दाले हातैले भग्नावशेष पन्छाएर मानिस खोज्ने प्रयास गरिरहेका छन् । अत्यावश्यक उपकरणको अभाव, कमजोर सञ्चार सञ्जाल तथा क्षतिग्रस्त सडक पूर्वाधार एवम् पुलका कारण खोजी कार्यमा असर परिरहेको छ ।
बीबीसीसँगको कुराकानीमा एक उद्धारकर्मीले भनेका छन्– ‘उद्धार कार्यमा कुनै समन्वय छैन, नेतृत्व गर्न कोही छैन अथवा के कसरी गर्ने भन्नलाई कोही छैन । स्थानीय बासिन्दाले आफ्ना लागि आफैँ गर्नुपरेको छ । शव भेटिहाले पनि कहाँ पठाउने भन्ने टुङ्गो छैन । अस्पतालमाथि चाप छ ।’
