गाजामा २०२३ देखि सुरु भएको युद्धयता ६३ हजारभन्दा बढी प्यालेस्टीनीहरूको मृत्यु भएको छ । गाजाको स्वास्थ्य मन्त्रालयका अनुसार अक्टोबर ७, २०२३ देखि सुरु भएको युद्धयता गाजामा मारिएका प्यालेस्टीनीहरूको संख्या ६३ हजार नाघेको छ ।
शुक्रबार पनि कम्तीमा ५९ जनाको ज्यान गएको र २४४ जना घाइते भएका स्वास्थ्य मन्त्रालयले जनाएको छ । मन्त्रालयले जारी गरेको विज्ञप्तिमा भनिएको छ, ‘धेरै पीडितहरू अझै भग्नावशेषमा फसेका छन् । तर लगातारको बमबारी र स्रोतको अभावका कारण उद्धार कार्य अवरुद्ध भएको छ ।’
युद्ध सुरु भएदेखि हालसम्म ६३ हजार २५ जना मारिएका र १ लाख ५९ हजार ४९० जना घाइते भएको मन्त्रालयले जनाएको छ । मार्च १८ यता मात्र ११ हजार १७८ जनाको ज्यान गएको र ४७ हजार ४४९ जना घाइते भएका छन् ।
खाद्य संकटका कारण पछिल्लो २४ घण्टामा दुई बालबालकसहित पाँच जनाको मृत्यु भएको मन्त्रालयले जनाएको छ । यससँगै भोकमरी र कुपोषणका कारण ज्यान गुमाउनेहरूको संख्या ३२२ पुगेको छ, जसमा १२१ बालबालक रहेका छन् ।
यसैबीच, गाजाको नागरिक सुरक्षा विभागका अनुसार शुक्रबार मात्रै विभिन्न स्थानमा भएको आक्रमणमा कम्तीमा ४८ जना मारिएका छन् । प्रवक्ता महमुद बसलका अनुसार, दक्षिणी खान युनिसमा विस्थापितहरूको टेन्ट शिविरमा भएको गोलाबारीमा १८ जनाको ज्यान गएको छ ।
उत्तरी गाजामा जाबालिया अल–नजला क्षेत्रमा घरमाथि भएको हवाई आक्रमणमा पाँच जना मारिएका भने जेतुन, शेख रादवानलगायतका क्षेत्रमा भएका छुट्टाछुट्टै आक्रमणमा एक बालबालकसहित छ जनाको मृत्यु भएको छ । राहत वितरण केन्द्र नजिकै पनि छ जनालाई गोली हानी मारिएको बसलले बताए ।
यसैबीच, इजरायली सेनाले गाजा सिटीमा “प्रारम्भिक चरणको सैन्य आक्रमण” सुरु भएको पुष्टि गर्दै हमासलाई पूर्ण रूपमा सैन्य र प्रशासनिक रूपमा समाप्त गर्ने प्रतिज्ञा गरेको छ ।
संयुक्त राष्ट्रसंघीय निकायले गाजा सिटीलाई युद्ध क्षेत्र घोषित गरिँदा करिब १० लाख मानिस जबरजस्ती विस्थापित हुने जोखिममा पर्ने चेतावनी दिएको छ ।
अक्टोबर ७, २०२३ मा हमासले दक्षिणी इजरायलमा गरेको अभूतपूर्व आक्रमणमा करिब १,२०० जना मारिएका र २५१ जना अपहरणमा परेका थिए । त्यसपछि इजरायलले गाजामा व्यापक सैन्य कारबाही सुरु गरेको हो ।
