काठमाडौं । पूर्वराजा ज्ञानेन्द्र शाहले मुलुकमा विद्यमान राष्ट्रिय समस्याको समाधान गर्नु अघि निर्वाचन प्रक्रियामा प्रवेश नगर्नुपर्ने सुझाव दिएका छन्। उनले ७४औँ राष्ट्रिय प्रजातन्त्र दिवसको अवसरमा बुधबार जारी गरेको भिडियो सन्देशमा यस धारणा व्यक्त गरेका हुन्।
पूर्वराजा शाहले भनेका छन् कि प्रजातन्त्रमा प्रतिनिधि छनोटका लागि निर्वाचन स्वाभाविक प्रक्रिया हो, तर अहिलेको संवेदनशील परिस्थितिलाई बुझेर मात्र चुनावमा जानु आवश्यक छ। उनका अनुसार, “यतिखेरको आम जनभावना यही छ कि राष्ट्रिय समस्या समाधान गरिसकेपछि मात्र निर्वाचनतर्फ अगाडि बढ्नु उपयुक्त हुनेछ।”
सन्देशमा उनले राष्ट्रिय सहमति र सबै पक्षलाई समेट्ने समझदारीको महत्वमा जोड दिँदै, निर्वाचनपछि द्वन्द्व, अशान्ति र खिचातानी हुन नदिन पूर्वतयारी आवश्यक भएको बताएका छन्।
पूर्वराजा शाहको यो अभिव्यक्ति राजनीतिक दल र निर्वाचन तयारीमा रहेका सबै पक्षका लागि संकेतको रूपमा लिइएको छ। उनका अनुसार, राष्ट्रिय समझदारी कायम रहँदा मात्र देशले स्थिरता र प्रगतिशील मार्ग पाउनेछ।
