भारतको राजधानी नयाँ दिल्लीमा विगत केही दिनदेखि प्रदूषणको स्तरले खतराको तह पार गरेपछि दिल्ली सरकारले विभिन्न उपाय लागू गर्ने तयारी गरेको छ । सर्वोच्च अदालतले गाडीमा जोर बिजोर प्रणाली ठीक भएको समीक्षा गरेकाले दिल्लीमा अब जोर बिजोर लागू हुनेछ ।
यस्तै, वायु प्रदूषणसँग जुध्न यही नोभेम्बरको २० तारिखदेखि क्लाउड सिडिङमार्फत् कृत्रिम वर्षा गराउने योजना रहेको छ । दिल्लीका वातावरण मन्त्री गोपाल राईका अनुसार यातायात विभागलाई एपमा आधारित ट्याक्सी अर्थात् ओला–उबेरलाई ‘सर्वोच्च अदालतको आदेश अनुसार’ प्रतिबन्ध लगाउन निर्देशन दिइएको छ ।
सर्वोच्च अदालतले अस्ति मंगलवार दिल्ली सरकारलाई दिल्लीमा दर्ता भएका ट्याक्सीहरू मात्र सहरमा चल्न दिने विषयमा सोच्न सक्ने आदेश दिएको छ । दिल्ली बाहिरबाट एक जना मात्रै बोकेर ठूलो संख्यामा गाडी दिल्लीमा भित्रँदा प्रदूषण झन बढेको भन्दै सरकारले यसलाई रोक लगाउने तयारी गरेको छ ।
यस्तै, प्रदूषणको बढ्दो स्तरलाई ध्यानमा राख्दै, दिल्ली सरकारले डिसेम्बरको सट्टा आजदेखि १८ तारिखसम्म जाडो बिदाको समय तालिका बनाएको छ ।
