काठमाडौं- नेकपा एकीकृत समाजवादी पार्टीका अध्यक्ष माधवकुमार नेपालले जनता समाजवादी पार्टीका अध्यक्ष उपेन्द्र यादवलाई अपमानपूर्वक सरकारबाट निकालिएको बताएका छन् ।
पार्टीको केन्द्रीय कमिटीको आठौँ बैठकलाई ललितपुरको बालकुमारीमा मंगलबार सम्बोधनका क्रममा उनले सरकारमा आफूहरूको उपस्थिति पनि दयनीय रहेको टिप्पणी गरे ।‘हामीले केही दिन पहिले देख्यौँ । यो गठबन्धन सँगसँगै जाला कि भन्ने ठानेका थियौँ । निर्वाचनपछिको संसद् यसको अवधिभर सँगै जाला भनेका थियौँ । तर समाजवादी मोर्चाको एउटा मुख्य घटक जनता समाजवादीपार्टीलाई विभाजित गरियो’, उनले भने, ‘जसपालाई विभाजित गरिएको मात्रै होइन, सरकारबाट पनि निकालियो । आफैं राजीनामा दिएर जसपा अलग भएको होइन, सरकारबाट निकालियो, मुन्टाउने काम मात्रै भएन ।’
यदि यदि उपेन्द्र यादवले राजीनामा नदिएको भए उनलाई गल्हत्याउने पनि उनले बताए । ‘उपेन्द्र यादवले राजीनामा नदिएको भए सरकारबाट गल्हत्याउँथे’, उनले भने, ‘काम छँदाको भाँडो काम सकेपछि उपेन्द्र यादव ठाँडो भए ।’ उनले एमाले अध्यक्ष केपी शर्मा ओलीले गरेको संसद् विघटनलाई प्रतिगमन भने । ‘केपी ओलीको प्रतिगमनविरुद्ध जुध्न हामी सँगसँगै अघि बढेका थियौँ ।निर्वाचनपछि गठबन्धनको मुख्य घटक जसपा अहिले विभाजन भयो, विभाजित गरियो’, उनले भने, ‘विभाजन गरिसकेपछि अशोककुमार राईको नेतृत्वमा जनता समाजवादी पार्टी घोषणा गरियो । निर्वाचन आयोगले पनि मान्यता दियो । अब यसको छिनोफानो अदालतले गर्नेछ ।’
अध्यक्ष नेपाले सरकारमा आफूहरूको भूमिकालाई लिएर निराशा प्रकट गरे । ‘हाम्रो पार्टीलाई सरकारका निर्णय र बैठकहरूमा सहभागी गराइएको छैन । हाम्रो पार्टीलाई बेवास्ता गरिएको छ,’ नेपालले भने,‘संसद्को अवरोध हटाउने सन्दर्भमा हामीलाई सोधिँदैन । यी हाम्रा पीडा र वेदना हामीसँग छन् । सत्ताको निम्ति मरिहत्ते गर्ने हो कि स्वतन्त्र स्वाभिमान कायम राख्नेबारे सोच्ने बेला भएको छ ।’
उनले आगामी आर्थिक वर्षको नीति तथा कार्यक्रम बनाउँदा पनि आफूहरूलाई नसोधिएको बताए । ‘नयाँ नीति तथा कार्यक्रममा पनि हामीलाई सोधेका छैनन्’, उनले भने, ‘संसदीय दललाई पनि सोधेनन् । हामी कसैलाई सोधीखोजी गरेनन् । बजेट निर्माणबारे पनि कसैले सोधेनन् । त्यसैले हामीले अब सरकारबारे सोच्ने अवस्था आइसकेको छ । ’
