देशभरका सहकारी पीडितले आज शुक्रबार देखि तेस्रो चरणको आन्दोलन घोषणा गरेका छन्‌ । सहकारी ठगीमै मुछिएका उपप्रधान तथा गृहमन्त्री रवि लामिछानेले सरकारी कार्यालय सिंहदरबारमा कार्यसम्पादन गरिरहँदा त्यसैको दक्षिण-पश्चिमी छेउ माइतीघर मण्डलामा सहकारी पीडितहरू आक्रोश र आँशुसहित विरोध प्रदर्शनरत छन्‌ ।

यसअघि पनि दुई पटकसम्म सहकारी पीडितहरूले काठमाडौं केन्द्रित आन्दोलन गरेका थिए । प्रदर्शन गर्दा दमन र अनसन थाल्दा फक्याइफुल्याई कागजी सम्झौता गराएको सरकारले कार्यान्वयन नगर्दा आफूहरू पुनः आन्दोलनमा उत्रनुपरेको सहकारी पीडितहरूले बताइरहेका छन्‌ । अन्य दिनको तुलनामा निकै गर्मी महसुस भएको शुक्रबार मध्याह्न सहकारी पीडितहरू भने काठमाडौंमा थप तातेको कालोपत्रे सडकमा प्रदर्शन र धर्ना दिँदैछन्‌ । यसपटक काठमाडौंसहित देशव्यापी आन्दोलन घोषणा गरेका सहकारी पीडितहरूको हुलिया र मुखाकृति नियाल्दा तिनको अनुहारमा थप छट्पटी देखिएको छ । दूरदराजबाट आएका महिला रुँदै र असिनपसिन हुँदै विरोध प्रदर्शनमा सहभागी भइरहेका छन्‌ ।