काठमाडौं । प्रमुख प्रतिपक्ष दल नेपाली कांग्रेसका सांसद सपना राजभण्डारीले काठमाडौं उपत्यकामा नदीहरू सहरमा पसेको नभई बस्ती नदीमा बसेको बताएकी छन् । जसका कारण विगत केही दिनदेखि काठमाडौं डुबानमा परेको भन्दै समस्या समाधानमा सरकारको ध्यानाकर्षण गराएकी छन् ।
सोमबार प्रतिनिधिसभा बैठकको शून्य समयमा बोल्दै उनले तीनै तहका सरकारहरूले मिलेर दीर्घकालीन समाधानको खोजी गर्न ढिला गर्न नहुने बताइन् । उनले पछिल्ला केही दिनयता मनसुनी वर्षाका कारण देशका विभिन्न भागमा बाढीपहिरोले जनजीवन अस्तव्यस्त बनेको र जनधनको क्षति भएकोमा पनि सरकारको ध्यानाकर्षण गराइन् ।
“यहाँका खोला, नदीहरू सहरका बस्तीहरूमा पसेका होइनन् । सहर, बस्तीहरू खोला, नदीनाला बग्नुपर्ने ठाउँहरूमा ठडिँदा डुबानमा पर्ने, बगाउने भएको हो,” उनले भनिन्, “यो समस्या हल गर्नका लागि तीनै तहका सरकारहरूले मिलेर दीर्घकालीन समाधानको खोजी गर्न ढिला नगरोस् ।”
