एजेन्सी– उत्तर कोरियाका कम्युनिष्ट तानाशाह किम जोङ उनले अमेरिकी राष्ट्रपतिमा आफ्ना पूर्व समकक्षी डोनाल्ड ट्रम्पलाई चाहेका दाबी गरिएको छ । प्योङयाङबाट भागेका एक उच्च अधिकारीले यस्तो दाबी गरेका बीबीसीले उल्लेख गरेको छ ।

ती अधिकारी रि इल क्यू हुन्‌, जो सन्‌ २०१६ पछि उत्तर कोरियाबाट भाग्ने सबैभन्दा उच्च ओहदाका हुन्‌ । उनी किम जोङ उनसँग कम्तिमा सातपटक एउटै मञ्‍चमा देखिएका थिए । दक्षिण कोरियातर्फ भाग्नुअघि उनी क्यूबामा उत्तर कोरियाका लागि काम गर्थे । उनका अनुसार झट्ट हेर्दा किम सामान्य व्यक्तिजस्ता देखिन्छन्‌, तर आफ्नो अस्तित्वका लागि जे सुकै पनि गर्न सक्छन्‌ ।

उत्तर कोरिया आणविक शक्ति र हतियारसम्पन्न मुलुक हो । शान्ति वार्ताका लागि भन्दै सन्‌ २०१९ मा ट्रम्प र किमले भेटघाट गरेका थिए । तर, सो वार्ता निस्कर्षमा नपुगी टुङ्गिएको थियो ।

सो वार्तापछि पनि उत्तर कोरियाको संस्थापनलाई ट्रम्प नै अमेरिकी राष्ट्रपति भए आणविक कार्यक्रमबारे अमेरिकासँग वार्ता गर्न सहज हुने लागिरहेको रि इल क्यूले बताएका हुन्‌ ।

डोनाल्ड ट्रम्पले यसअघि नै किम जोङ उनसँग भएको वार्ता र कूटनीतिक सम्बन्धलाई आफ्नो कार्यकालको महत्वपूर्व उपलब्धि भएको बताइसकेका छन्‌ ।

गत महिना आयोजित एक र्‍यालीलाई सम्बोधन गर्दै ट्रम्पले पनि आफूलाई किम जोङले पुनः अमेरिकी राष्ट्रपति कार्यालयमा देख्न चाहेको दाबी गरेका थिए । साथै, किम जोङले सम्झिरहेको आफूलाई लागेको उनले बताएका थिए ।

रि इल क्यूका अनुसार, उत्तर कोरिया ट्रम्पसँगको राम्रो सम्बन्धको फाइदा उठाउन चाहन्छ । तर, गत महिना उत्तर कोरियाले अमेरिकामा को राष्ट्रपति बन्छ भन्ने कुराले आफूलाई कुनै फरक नपर्ने जनाएको थियो ।

उत्तर कोरियाले परमाणु हतियार चाहिँ कहिल्यै नष्ट नगर्ने रि इल बताउँछन्‌ । यसको साटो आफूमाथि लागेको प्रतिबन्ध हटाउनका लागि परमाणु कार्यक्रम रोक्न चाहिँ सहमत हुनसक्ने उनको दाबी छ ।