काठमाडौं । उपप्रधानमन्त्री एवं सहरी विकासमन्त्री प्रकाशमान सिंहले सुरक्षित र व्यवस्थित सहर बनाउन सहरी विकास मन्त्रालयले काम गरिरहेको बताएका छन् ।
काठमाडौं क्षेत्र नं १ मा मंगलबार आयोजित कार्यक्रममा उनले सहरी विकास र पूर्वाधार निर्माणका लागि सहर र ग्रामिण क्षेत्र दुवैलाई प्राथमिकतामा राखेर मन्त्रालयले काम गरिरहेको बताएका हुन् ।
उपत्यकाका बागमती, विष्णुमतिलगायतका नदीमा सुधार ल्याउन र ढल व्यवस्थापनमा मन्त्रालयले प्रयास गरिरहेको भन्दै सिंहले परिणाम देखिन केही समय लाग्ने बताए ।
‘जसरी चलिरहेको छ त्यसैगरी चलाउँ भनेर हुँदैन । सुधारका लागि काम गर्न प्रयास गरिरहेको छु । त्यसमा केही समय लाग्छ,’ मन्त्री सिंहले भने, ‘संविधानले दिएको अधिकारलाई आवश्यक कानून बनाएर कार्यान्वयन गर्दै सबै जनताले परिवर्तनको महसुस गराउन सक्नुपर्छ ।’
अहिलेको सरकारलाई काम नगर्ने छुट नभएको भन्दै उनले सरकारले जनतामा आशा जगाउने गरी काम गर्ने बताए ।
देशभर सुरक्षित र व्यवस्थित सहर बनाउन सहरी विकास मन्त्रालयले काम गरिरहेको उनको भनाइ थियो ।
मन्त्री सिंहले काठमाडौं उपत्यका विकास प्राधिकरण, अधिकार सम्पन्न बागमती सभ्यता एकीकृत विकास समिति सहरी विकास मन्त्रालयअन्तर्गत रहेको भन्दै उनले राजधानी काठमाडौंलाई व्यवस्थित बनाउन र उपत्यकाका नदी प्रणााली सुधार्ने काम प्राथमिताका साथ अघि बढिरहेको बताए ।
