काठमाडौं। नेपाल प्रिमियर लिग (एनपीएल) को ट्रफी सार्वजनिक भएको छ । प्रधानमन्त्री केपी शर्मा ओलीको उपस्थितिमा ८ टिमका मार्की खेलाडीहरूले बिहान धरहरा परिसरबाट एनपीएलको ट्रफी अनावरण गरेका हुन् ।

अनावरण कार्यक्रमलाई सम्बोधन गर्दै प्रधानमन्त्री ओलीले सरकारले खेलकुद क्षेत्रलाई जति प्रोत्साहन गर्नुपर्ने हो, त्यति गर्न नसकेको बताए । ‘सरकारले खेलकुद क्षेत्रलाई सहयोग गर्न सकेको छैन, त्यसमा मलाई चित्त बुझेको छैन,’ उनले भने, ‘गर्नुपर्ने जति प्रोत्साहन गर्न सकेको छैन ।’

उनले नेपाली क्रिकेटका लागि आजको दिन विशेष रहेको बताए । ‘नेपाली क्रिकेट इतिहासको विशाल अनि उमङ्गमय पर्व एनपीएलले हाम्रा खेलाडीहरूको सपना र आगामी पुस्ताका लागि प्रेरणा प्रदान गर्दछ,’ प्रधानमन्त्रीले भने, ‘विश्वभरि छरिएर रहेका हाम्रा क्रिकेट प्रेमीहरुमात्र होइन अहिलेको पुस्ताले नेपाली खेलाडीहरूको मेहनत र सफलतालाई गौरवका साथ अङ्गालेका छन्‌ ।’