काठमाडौं । काठमाडौं महानगरपालिकाले सानो गौचरन रंगशाला पुनर्निर्माण सुरु गरेको छ । उपप्रमुख सुनिता डंगोलले शिलान्यास गरेर बिहीबार (आज)बाट पुनर्निर्माणको काम थालनी भएको हो ।

२२ करोड ९५ लाख ९३ हजार ९९९ लागत अनुमान गरिएको थियो । बोलपत्रबाट १८ करोड ८६ लाख ७४ हजार ८२७ रुपैयाँ कबोल गरेर शुभ कन्स्ट्रक्सनले पुनर्निर्माणको जिम्मा पाएको छ ।

स्टेडियम पुनर्निर्माणको शिलान्यास गर्दै उपप्रमुख सुनिता डंगोलले महानगरपालिकाले खेल पूर्वाधारमा लगानी बढाएको बताइन् । “सन्तुलित विकासका लागि भौतिक निर्माण, आर्थिक र सामाजिक विकाससँगै लैजानुपर्छ । यस क्रममा खेलकुदलाई विकासको आयामसँगै अगाडि लैजाने कार्यक्रमअन्तर्गत स्टेडियम पुनर्निर्माण गर्न लागेका हौँ,” उनले भनिन् । विद्यालयस्तरबाट खेलाडी उत्पादनका लागि कार्यक्रम सञ्चालन भइरहेको बताउँदै उनले यो प्रयासबाट राष्ट्रिय पहिचान दिन सक्ने खेलाडी प्राप्त हुने अपेक्षा राखे ।

वडामा रंगशाला पुनर्निर्माणले स्थानीय विकासलाई उचाइमा लैजाने वडा नं. ५ का अध्यक्ष वीरेन्द्र प्रजापतीले धारणा राखे । “टोल र चोकहरूमा मौलिक खेल पुनरुत्थान गरिरहेका छौँ । यहाँ व्यवस्थित फुटबल ग्राउन्ड निर्माण हुन्छ । भत्केको पुलमा करिब पाँच रोपनी क्षेत्रफल जमिनमा बास्केटबल, टेबुलटेनिस, व्याटमिन्टन र फुटसलका लागि पूर्वाधार तयार गरिरहेका छौँ,” प्रजापतीले कार्यान्वयनमा आएका योजनाका विषयमा जानकारी गराए ।

रंगशाला ९६×६२ मिटरको खेल मैदान हुनेछ । मैदानमा आकाशे पानी निकास प्रणालीसहितको कृतिम घाँस राखिनेछ । वरिपरि सिमा पर्खाल हुनेछ । यसमा २८ वटा चार पाङ्ग्रे र १७८ वटा २ पाङ्ग्रे सवारी साधन अट्ने क्षमताको पार्किङ हुनेछ ।

रंगशालाको भुइँतलामा महिलाका लागि २३ वटा र पुरुषका लागि १६ वटा शौचालय हुनेछन् । पहिलो तलामा महिलाका लागि सात र पुरुषका लागि पाँच वटा शौचालय हुनेछन् । रंगशालामा एउटा फिजियोथेरापी कक्ष, पुरुष र महिलाका लागि तीन–तीन वटा गरेर ६ वटा कपडा फेर्ने कोठा, एउटा प्राथमिक उपचार कक्ष र दुई वटा टिम लकर हुनेछन् ।

निर्माण कार्यको सार्वजनिक खरिदका लागि २०८१ वैशाख ३ गते सार्वजनिक सूचना जारी भएको थियो । यसबाट १६ जना आवेदकले प्रस्ताव पेस गरेका थिए । छनोट भएको निर्माण पक्षलाई कार्तिक २५ गते कार्यादेश दिइएको छ । यो काम २०८२ चैत मसान्तभित्र सम्पन्न गरिसक्नुपर्नेछ । रंगशाला १८ रोपनी एक आना दुई पैसा तीन दान (९२११.५ वर्गमिटर) क्षेत्रफलमा निर्माण हुनेछ । यसमा दर्शक क्षमता एक हजार ५०० जनाको हुनेछ ।