काठमाडौं। इजरायल र हमास युद्धविरामको सम्झौता नजिक पुगेका छन् । मध्यस्थकर्ता राखेर हमास र इजरायल कतारको दोहामा वार्ता गर्दै छन् ।

एपीन्यूजले हमास र इजरायलबीच छलफल भइरहेको सम्झौताको ड्राफ्ट नै सार्वजनिक गरेको छ । एपीका अनुसार, युद्धविरामको पहिलो चरण ४२ दिनको हुनेछ । त्यसपछि क्रमशः अरू दुई चरणको युद्धविराम हुनेछ ।

७ अक्टोबर २०२३ मा इजरायलमा हमला गरेको हमासले २५१ जनालाई बन्धक बनाएको थियो । उनीहरूमध्ये १५७ जना रिहा भइसकेका छन् । सन् २०२३ को २४ नोभेम्बरदेखि ३० नोभेम्बरसम्म भएको युद्धविरामका क्रममा हमासले १०९ जना बन्धक रिहा गरेको थियो ।

आठ जना बन्धकको इजरायली सेनाले उद्धार गरेको थियो । हमासको नियन्त्रणमा रहेकामध्येबाट ३७ जना बन्धकको मृत फेला परिसकेका छन् । त्यसैगरी, इजरायली सेनाको आक्रमणमा परेर तीन बन्धकको मृत्यु भएको छ । अहिले हमासको नियन्त्रणमा ९४ जना छन् ।