नेपाल नागरिक उड्डयन प्राधिकरणलाई विभाजन गर्ने विषयमा कर्मचारी प्राधिकरणमा कार्यरत कर्मचारीहरूका संगठनले विरोध जनाएका छन् । नेपाल राष्ट्रिय कर्मचारी संगठन नेपाल नागरिक उड्डयन प्राधिकरणले संस्कृति, पर्यटन तथा नागरिक उड्डयन मन्त्री बद्रीप्रसाद पाण्डेलाई ज्ञापनपत्र बुझाउँदै प्राधिकरणलाई विभाजन गर्ने विषयमा असहमति जनाएको हो ।
मन्त्री पाण्डेले माघ १९ गते संघीय संसदमा दर्ता गरी फागुन १३ गते प्रतिनिधिसभामा प्रस्तुत गरेको प्राधिकरणको विद्यमान संरचनालाई तहसनहस गरी दुईवटा प्राधिकरण बनाउने प्रक्रियाप्रति संगठनको असहमति र असन्तुष्टि रहेको भन्दै ध्यानाकर्षण गराएको हो ।
‘सञ्चालक समितिदेखिकै संरचनाहरूमा निजी क्षेत्रबाट कार्यकारी नियुक्त गर्ने, लगानी र सञ्चालनमा निजी क्षेत्र रहने व्यवस्थाहरूबाट प्रस्तुत विधेयकहरू नियमनकारी क्षमताको सुदृढीकरण तथा व्यवस्थापकीय कार्यको प्रभावकारिता अभिवृद्धितर्फ नभई नाफामा रहेका विमानस्थलको निजीकरण गरी राज्यको स्रोतको माफियाकरण गर्ने कुनियततर्फ लक्षित रहेको स्पष्ट हुन्छ’, संगठनले भनेको छ ।
नेपालको उडान सुरक्षाको क्षेत्रमा दूरगामी रूपमा व्युत्पादक प्रभाव पार्ने, प्राधिकरणमा कार्यरत कर्मचारीको भाग्य र भविष्यसँग जोडिएको प्राधिकरण विभाजन कर्मचारी युनियनसँग छलफल नै नगराई अगाडि बढाइएकोले स्वीकार्य नभएको संगठनले भनेको छ।
नेपालको वस्तुगत आवश्यकता र कर्मचारी लगायत सरोकारवालाको चासोलाई सम्बोधन गर्न भन्दै संगठनले आगामी ७ दिनभित्र सम्बोधन नगरेमा श्रृंखलाबद्ध आन्दोलनमा जाने घोषणा गरेको छ ।
