काठमाडौं। राइड शेयरिङ प्लेटफर्म इनड्राइभले आफ्ना सेवाग्राहीमाथि हुने कुनै पनि आपत्तिजनक वा गैरकानुनी गतिविधि कडा रूपमा अस्वीकार गर्ने बताएको छ ।
एसिया प्यासिफिक क्षेत्रका क्षेत्रीय निर्देशक मार्क टलीले शनिबार एक विज्ञप्ति जारी गर्दै यस्ता कार्यप्रति शून्य सहनशीलताको नीति अपनाएको र त्यस्ता गतिविधिको कडा निन्दा गर्ने स्पष्ट पारेका छन् ।
कम्पनीले सेवाग्राहीको सुरक्षा र सन्तुष्टिलाई सधैं उच्च प्राथमिकतामा राखेको र विशेषगरी महिलाहरूको सुरक्षामा ध्यान दिइरहेको जनाएको छ । हालै महिला सेवाग्राहीले भोगेको घटनाप्रति दुःख व्यक्त गर्दै इनड्राइभले पीडित सेवाग्राहीसँग क्षमा मागेको छ । कम्पनीले आफूलाई जिम्मेवार सेवाप्रदायकका रूपमा प्रस्तुत गर्दै सम्बन्धित निकायहरूसँग सहकार्य गरिरहेको पनि बताएको छ ।
‘हामी हाम्रा सेवाग्राहीको विश्वासलाई उच्च महत्व दिन्छौं र सेवालाई निरन्तर सुधार गर्न प्रतिबद्ध छौं,’ विज्ञप्तिमा उल्लेख छ । इनड्राइभले आफ्नो प्लेटफर्म प्रयोग गर्ने यात्रु र चालकहरूको सुरक्षाका लागि विभिन्न विशेषताहरू उपलब्ध गराएको पनि जानकारी दिएको छ ।
कम्पनीका सुरक्षा सुविधाहरूमा ‘सेफ्टी बटन’ प्रमुख रहेको छ, जसले प्रयोगकर्तालाई तत्काल सहायता प्राप्त गर्न सपोर्ट टिम, प्रहरी वा एम्बुलेन्ससँग सम्पर्क गर्न सक्षम बनाउँछ । ‘शेयर योर राइड’ फिचरले यात्रुहरूलाई आफ्नो यात्रा विवरण साथीभाइ वा परिवारसँग साझा गर्न मद्दत गर्दछ । साथै, प्रत्येक यात्रापछि यात्रु र चालकको मूल्याङ्कन गर्ने प्रोत्साहनले सेवालाई थप सुरक्षित बनाउने कम्पनीको विश्वास छ ।
