काठमाडौं । नेपाली कांग्रेसको केन्द्रीय समिति बैठकमा पार्टीबाट सरकारमा सहभागी मन्त्रीहरूको चर्को आलोचना भएको छ । बैठकमा बोल्ने अधिकांश केन्द्रीय सदस्यले पार्टीका मन्त्रीहरूको कार्यशैलीलाई लिएर आलोचना गरेका हुन् । केन्द्रीय सदस्यहरूले पुष्पकमल दाहाल प्रचण्ड नेतृत्वको अहिलेको सरकारमा रहने कि नरहने गम्भीर समीक्षा गर्न पनि माग गरेका छन् ।
केन्द्रीय सदस्य प्रदीप पौडेलले सरकारमा बस्नुमात्र उपलब्धि मान्न नहुने बताए। सभापति शेरबहादुर देउवालाई ध्यानाकर्षण गर्दै पौडेलले प्रधानमन्त्री प्रचण्डलाई जनमुखी काम गर्न आग्रह गर्नुपर्ने बताए। ‘अघिल्लो केन्द्रीय समितिले विभिन्न निर्णय गर्यो। तर ती निर्णय प्रेस विज्ञप्तिमै सीमित हुनु भएन,’ पौडेलले भने, ‘सभापतिले प्रधानमन्त्रीकहाँ गएर यो९यो काम गर्नुहोस् भनेर भन्न सक्नुपर्यो। गठबन्धन जोगाउनुमात्र उपलब्धि होइन।’
कांग्रेस सरकारमा बसेकाले पार्टी पनि लोकप्रिय हुने गरी काम गर्नुपर्ने उनको भनाइ थियो। ‘हाम्रा कुनै पनि मन्त्रीले राम्रो काम गरे भनेर मैले भाषण गर्न पाइनँ,’ उनले भने, ‘सरकारमा बस्नुमात्र उपलब्धि होइन।’
केन्द्रीय सदस्य राजीव ढुंगानाले महंगी दिनप्रतिदिन बढिरहेको र सरकारले अनुगमनसमेत नगरेको बताए। ‘यो सरकार जनताको सरकार हो भन्ने प्रत्याभूति दिने गरी आफ्ना कामकारबाही अघि बढाउने कि नबढाउने रु,’ उनले प्रश्न गरे, ‘सरकारले गरेका एक९दुई कामका जस प्रचण्डजीको पार्टीले लिने, सिंगो सरकारको असफलताको भारी कांग्रेसले बोक्नुपर्ने गरी अगाडि बढ्ने हो भने यो सरकारमा कांग्रेसको सहभागिताको अर्थ के हो, यसबारे गम्भीर र निर्ममतापूर्वक समीक्षा गर्ने बेला आएको छ।’
केन्द्रीय सदस्य भीम पराजुलीले सहमहामन्त्री महेन्द्र यादवमाथि खुकुरी प्रहार घटनामा सरकारमा सम्मिलित नेताहरूको धारणा मागे। ‘कांग्रेसलाई छानीछानी दुःख दिने गृहमन्त्रीको नियतबारे पनि समीक्षा हुनुपर्छ,’ उनले भने, ‘सुन प्रकरणमा माओवादी केन्द्रका उपाध्यक्ष कृष्णबहादुर महराको नाम समाचारमा आएका छन्। उनलाई न पक्राउ गरिन्छ न कुनै मुद्दा चल्छ।’
तर केन्द्रीय सदस्य रमा कोइराला पौडेलले कांग्रेसको तर्फबाट सरकारमा सहभागी मन्त्रीले राम्रो काम गरेनन् भनेर सार्वजनिक रुपमा नभन्न आग्रह गरेकी छन्। उनले सार्वजनिक रुपमा त्यसो भने पार्टीलाई क्षति पुग्ने भन्दै चिन्ता व्यक्त गरेकी छन्। ‘सरकारमा हाम्रा पनि मन्त्रीहरु हुनुहुन्छ। उहाँहरुको कुरा सार्वजनिक रुपमा बोलिरहेका छौँ।
मन्त्रीहरुले केही गर्नुभएन भनिरहँदा कांग्रेसलाई नै असर गर्छ,’ सदस्य कोइरालाले भनिन्। उनले पदाधकारीहरुको बैठकमा बोलाएर मन्त्रीहरुसँग छलफल गर्न पनि आग्रह गरेकी छिन्। म पदाधिकारीलाई आग्रह गर्न चाहन्छु, हाम्रा मन्त्रीहरुलाई बोलाएर पदाधिकारीको बैठकमा छलफल गर्ने वातावरण बनाओस् भन्ने आग्रह गर्न चाहन्छु,’ कोइरालाले भनिन्।
सम्बन्धित समाचार
लोकप्रिय समाचार
