काठमाडौं । प्रधानमन्त्री पुष्पकमल दाहाल प्रचण्ड सहभागी एक कार्यक्रममा नाराबाजी गर्ने तीन युवा धरौटीमा रिहा भएका छन् । चैत ७ गते प्रधानमन्त्री प्रचण्डविरुद्ध नाराबाजी गरेको आरोपमा पक्राउ परेका तीनजना मंगलबार धरौटी बुझाएर रिहा भएका हुन् ।
रिहा हुनेमा सोलुखुम्बुका २३ वर्षीय उद्धव बस्नेत, बागलुङका ३० वर्षीय सोम शर्मा र बझाङका १८ वर्षीय विप्लव खड्का छन् । उनीहरुलाई अभद्र व्यवहार मुद्दामा काठमाडौंका प्रमुख जिल्ला अधिकारी घनश्याम उपाध्यायले चैत १२ गते पाँच हजार धरौटी तोकेका थिए । धरौटी जम्मा गर्न नसकेपछि तीनैजनालाई केन्द्रीय कारागार चलान गरिएको थियो ।
मंगलबार धरौटी बुझाएपछि उनीहरुलाई रिहा गरिएको जिल्ला प्रशासन कार्यालय काठमाडौंले जानकारी दिएको छ ।
