काठमाडौं । सरकारले एकल महिलाबाट जन्मेको र बाबुको ठेगाना नभएको बच्चाको जन्मदर्तालगायत सरकारी कागजपत्र आमाको ठेगानमा बनाउन ७७ जिल्लाकै वडा कार्यालयहरुलाई निर्देशन जारी गरेको छ ।

गृहमन्त्रालयअन्तर्गत राष्ट्रिय परिचयपत्र तथा पञ्जीकरण विभागले देशका ६ हजार ७४३ वटै वडा कार्यालयका स्थानीय पञ्जिकाधिकारीलाई ४ बुँदे सर्कुलरमार्फत निर्देशन दिएको हो ।

सो निर्देशनमा विवाहअघि जन्मिएको र पितृत्वको ठेगान भएको बच्चाको जन्मदर्ता मावलीको थर राखी आमाको स्थायी ठेगानामा गर्ने भनिएको छ । त्यस्तै बच्चा मावलीमै बसेको भए सोही ठेगानामा दर्ता गर्नुपर्ने पनि निर्देशनमा उल्लेख छ । साथै, बाबुको ठेगाना पत्ता लागेको खण्डमा सोही ठेगाना नयाँ जन्म दर्ता गर्ने भनिएको छ ।