काठमाडौं। सुनसरीको धरान उपमहानगरपालिकाका उपमेयर अइन्द्रविक्रम बेघाको घर तोडफोडमा संलग्न भएको आरोपमा प्रहरीले एक जनालाई पक्राउ गरेको छ ।
सुनसरी प्रहरी प्रमुख एसपी बिपिन गौतमले घटनामा संलग्न एक जनालाई मंगलबार साँझ पक्राउ गरिएको जानकारी दिए पनि उनको नाम भने सार्वजनिक गर्न मानेनन् ।
‘आक्रमणमा संलग्न एकजना पक्राउ परेका छन्, अन्यको खोजी भइरहेको छ,’ एसपी गौतमले भने, ‘हामी उनीहरूलाई पनि चाँडै पक्राउ गर्ने छौँ।’
घटनाको विषयमा थप अनुसन्धान भइरहेको पनि उनले बताए । राजनीतिक कारण भन्दा अन्य विवादको कारण उपमेयर बेघाको घरमा तोडफोड भएको अनुमान प्रहरीले गरेको छ । धरान उपमहानगरपालिका-१५ स्थित खिरिया बस्तीमा पुगेर मंगलबार एक समूहले बेघाको घरमा तोडफोडसहित आक्रमण गरेको थियो।
तोडफोडबाट बेघाको घरको झ्यालका शिशाहरु फुटेको छ । बेघाका भाइ विष्णुलाई कुटपिट गर्न पुगेको समूहले घर तोडफोड गरेको हो । घर तोडफोड हुनेबित्तिकै खबर गरिए पनि प्रहरी इलाका प्रहरी कार्यालय धरानका डीएसपीले बेवास्ता गरेको आरोप बेघाले लगाएका छन् ।
एसपी गौतमले भने बेघाको घरमा तोडफोड हुँदा तत्काल प्रहरी नपुगेकोबारेमा छानबिन गरिने बताए । उपप्रमुख बेघाले पनि राजनीतिक कारणले नभइ व्यक्तिगत कारणले आफ्नो घरमा तोडफोड भएको बताएका छन् । बेघाका कान्छा भाइ विष्णुको बीपी कोइराला स्वास्थ्य विज्ञान प्रतिष्ठानमा उपचार भइरहेको प्रहरीले जनाएको छ।
