श्रीमान् चेतन मानन्धरको हत्या गर्ने योगराज ढकाल ९रिगल० लाई सरकारले दिएको कैद मिनाहाविरुद्ध अनशन शुरु गरेकी भारती मानन्धर अस्पताल भर्ना भएकी छिन् । उनको अहिले वीर अस्पतालमा उपचार भइरहेको छ ।
भारती आज बुधवार सर्वोच्च अदालत परिसरमा बेहोस भएर ढलेपछि उनलाई उपचारका लागि वीर अस्पताल लगिएको हो । आममाफीविरुद्ध उहाँले दायर गर्नुभएको रिटको सर्वोच्चमा आज पहिलो पेसी थियो । तारिख लिएर फर्किने क्रममा उनी बेहोस भएकी हुन् ।
न्यायका लागि नेपालगञ्जबाट काठमाण्डौ आएकी भारतीले माइतीघरमा आजदेखि रिले अनशन शुरु गरेकी हुन् । अनशन शुरु गर्ने क्रममा उनले न्याय नपाएसम्म सङ्घर्ष कायम राख्ने बताइन् ।
रिगलविरुद्ध २०७२ असार २८ गते नेपालगञ्जको धम्बोजी चोकमा चेतनमाथि खुँडा प्रहार गरी हत्या गरेको अभियोग थियो । उनलाई जिल्ला अदालत बाँकेका तत्कालीन न्यायाधीश विष्णु सुवेदीको इजलासले २०७६ वैशाखमा दोषी ठहर गर्दै सर्वस्वसहित जन्मकैदको सजाय सुनाएको थियो । तर संविधान दिवसको अवसरमा सरकारको सिफारिसमा राष्ट्रपतिले कैद मिनाहा गरेपछि रिगल छुटेका थिए ।
