वीरगञ्ज सुख्खा बन्दरगाह भन्सारमा अवैध रुपमा आएर बसेका ३९१ कन्टेनरको भौतिक परीक्षण हुने भएको छ । विभिन्न समयमा भन्सार क्षेत्रमा भित्रिएका तर कन्टेनरको भन्सार जाँचपास गर्न नआएका कन्टेनरमा शंकास्पद वस्तुहरु आयात भएको आशंकामा भौतिक परीक्षण गर्न लागिएको हो ।

वीरगञ्ज सुख्खा बन्दरगाहका प्रमुख भन्सार प्रशासक डा रामप्रसाद मैनालीले भन्सार जाँचपासका लागि दिइएको समयमा व्यवसायीहरु आंशिक मात्रै आएको बताए । मंसिर १० गते एक सूचना निकालेर भन्सार कार्यालयले विभिन्न अवस्थामा नेपाल भित्रिएको कन्टेनरको जाँचपास गराउन आह्वान गरेको थियो ।

प्रारम्भिक रिपोर्टमा ड्रेडिङ कम्पनीले आयात गर्न नपाउने वस्तुहरु, नेपालमा आयातमा प्रतिबन्ध लागेका वस्तुहरु लगायतको आयात भएका सूचनापछि वस्तुको भौतिक जाँच गर्न लागिएको भन्सार कार्यालयले जनाएको छ । ‘तोकिएको समयमा निम्न मात्रै जाँचपासका लागि सम्पर्कमा आएका छन्,’ मैनालीले भने, ‘अब ती कन्टेनरको मुचुल्का साक्षी बसाएर भौतिक परीक्षण गर्नुपर्ने देखिएको छ ।’

कन्टेनरमा मदिरा, केराउ, सवारी साधनका पार्टपूर्जा लगायत वस्तुहरु रहेको भनी घोषणा भएको देखिएको छ । तर केही वस्तुहरुको परिमाण र आयात नेपालमा निषेधित वस्तु भएका कारण झनै शंका उब्जिएको विभागले जनाएको छ ।