सुन तस्करीबारे छानबिन गर्न सरकारले बनाएको उच्चस्तरीय समितिले ६१ किलो सुन प्रकरणबारे राजश्व अनुसन्धान विभागका अधिकारीहरुसँग छलफल गरेको छ । सिंहदरबारस्थित आयोगको कार्यालयमा बोलाएर विभागका प्रमुख नवराज ढुंगानासहितका अधिकारीहरुसँग सुन प्रकरणबारे सोधपुछ गरेको समितिका एक अधिकारीले बताए । त्रिभुवन अन्तर्राष्ट्रिय विमानस्थलबाट भन्सार जाँच पार गरेर बाहिरिएको ब्रेक प्याडभित्र लुकाएर ल्याएको सुन २ साउनमा विभागले बरामद भएको थियो ।
१९ दिनसम्म विभागले अनुसन्धान गरेपछि यसमा संगठित अपराधको तत्व देखिएको भन्दै थप अनुसन्धानका लागि फाइल प्रहरीको केन्द्रीय अनुसन्धान ब्यूरो सीआईबी लाई बुझाइएको थियो । ‘घटनाको सुरुवाती अनुसन्धान विभागले गरेकाले त्यसबारे केही विषयहरु बुझ्न उहाँहरुलाई बोलाएका थियौं’, समितिमा एक सदस्यले भने ।समितिले सीआईबीकी निर्देशक एआईजी किरण बज्राचार्य, एसपी सञ्जयसिंह थापा र डीएसपी दुर्गा दाहालसँग पनि सोधपुछ गरेको समितिले जनाएको छ ।
समितिले चुडामणि उप्रेती गोरे मुछिएको ३३ किलो सुन प्रकरणदेखि विद्युतीय सिगरेट भेपमा लुकाएर भएको सुन तस्करीसहितका घटनाहरुलाई जोडेर छानबिन गरिरहेको छ । गृह मातहतको निकायमार्फत अनुसन्धान अघि बढाउँदा राजनीतिक नेक्सस नखुलेको भन्दै प्रमुख प्रतिपक्षी नेकपा एमालेले आरोप लगाइरहेका बेला सरकारले पूर्वन्यायाधीश डिल्लीराज आचार्यको नेतृत्वमा उच्चस्तरीय समिति बनाएको थियो । तीन महिनाको अवधिमा काम नसकिएपछि समितिको म्याद पुनः थप भएको छ । यो अवधिमा समितिले आफ्नो कामलाई निष्कर्षतिर लगिरहेको छ । त्यसक्रममा विभिन्न निकायका पदाधिकारीसँग समितिले सोधपुछ गरिरहेको समितिका एक सदस्यले बताए ।
