नेपाली कांग्रेसका नेता डा. शेखर कोइरालाले केही महिना भित्रै सत्तारुढ गठबन्धन टुट्ने बताएका छन् । उनले पीडित मैत्री कानून भए मात्रै सङ्क्रमणकालीन न्याय सम्बन्धी विधेयक पारित गर्न नेपाली कांग्रेसले साथ दिने स्पष्ट पारे ।

उनले गठबन्धन नेपाली कांग्रेसले विपक्ष भएको नाताले सत्तामा जानका लागि कोसिस गरिराख्ने र त्यो केही महिना भित्रै सफल हुने नेता कोइरालाको दाबी छ ।

शनिबार काठमाडौँमा आयोजित बीपी स्मृति सामुदायिक अस्पतालको १६ औँ वार्षिक साधारण सभामा बोल्दै नेता कोइरालाले गठबन्धन बन्ने र भत्किने कुराले देश नबन्ने भन्दै यसलाई रोक्नका लागि निर्वाचन प्रणालीमा नै सुधार गर्नुपर्ने समेत दाबी गरे ।

राष्ट्रिय सभालाई समावेशी समानुपातिक प्रतिनिधित्व गराउने र प्रतिनिधि सभालाई प्रत्यक्ष निर्वाचित हुने निर्वाचन प्रणाली अवलम्बन गरे मात्रै कुनै एक दलले बहुमत ल्याउने र मुलुकमा राजनीतिक स्थायित्व र विकास, निर्माणको कामले गति लिन सक्ने नेता कोइरालाको भनाइ थियो

उनले आगामी निर्वाचनमा नेपाली कांग्रेसले गठबन्धन गरेर नजाने अडान समेत राखे । उनले भने, ‘हामीहरू गठबन्धनमा जानुहुँदैन । जान्दैनौँ । अबदेखि हामी एक्लै चुनाव लड्छौँ भन्ने प्रण हामी गर्छौँ । ढुक्क हुनुहोस्- नेपाली काँग्रेस अब एक्लै चुनाव लड्छ ।’

नेता कोइरालाले पीडित मैत्री भए मात्रै सङ्क्रमणकालीन न्याय सम्बन्धी विधेयक पारित गर्न नेपाली कांग्रेसले साथ दिने स्पष्ट पारे । उनले भने–‘सत्य निरूपण तथा मेलमिलापमा नेपाली काँग्रेस लचिलो छ । एमाले अप्ठ्यारो भएको छ । र, त्यो टीआरसी विधेयक भन्छौँ हामी । त्यो पास भएन भने म त अफ्ठ्यारोमा पर्छु भन्ने लागेको हुन सक्छ उहाँलाई । अनि के गर्नु भयो भने एमाले सित त कुरा गर्नुभयो । नेपाली कांग्रेसले मानिहाल्छ भनी ठान्नुभयो । तर आज यही मञ्चबाट म भन्न चाहन्छु–नेपाली काँग्रेस सर्वोच्च अदालतले दिएको निर्देशनलाई पालना गर्छ ।