नयाँदिल्ली- २०७७ जेठमा जारी भएको चुच्चे नक्सालाई १०० रुपैयाँ दरको नोटमा राख्ने नेपालको निर्णयप्रति आपत्ति जनाएको भारतले अब पाकिस्तान प्रशासित कश्मिरलाई पनि आफ्नो अहम हिस्सा भनेको छ ।
नेपाल राष्ट्र बैंकले भारतले ओगटिरहेको नेपाली भूमि कालापानी, लिम्पियाधुरा र लिपुलेक समेटेर जारी चुच्चे नक्सा नोटमा राख्ने कदमले धरातलीय वास्तविकता नफेरिने प्रतिक्रिया भारतीय विदेश मन्त्री एस जयशंकरले केही दिनअघि दिएका थिए ।
यता नेपालमा पनि राष्ट्रपति रामचन्द्र पौडेलका आर्थिक सल्लाहकार डा। चिरञ्जीवी नेपालले सयको नोटमा चु्च्चे नक्सा राखेर भारतलाई चिढ्याउन ठिक नहुने बताएपछि विवादको भूमरीमा परेका छन् ।
सीमालाई लिएर नेपालसँग विवाद चलिरहेका बेला भारतका विदेश मन्त्री एस जयशंकर बिहीबार पाकिस्तान प्रशासित कश्मिरलाई भारतको अहम हिस्सा भनेका छन् ।
राजधानी नयाँदिल्लीको गार्गी कलेजमा एक प्रश्नको जवाफ दिने क्रममा उनले यस्तो दाबी गरेका हुन् ।
एस जयशंकरले भने ‘मानिसहरू सोच्दथे अनुच्छेद ३७० हटाउन सकिँदैन । तर जब हामीले यसलाई हटाइदियौँ, सारा धरातलीय स्थितिमा फेरिएको छ।’
उनले पाकिस्तान अधिनस्थ कश्मिर भारतकै रहेको कुरामा सबै दल एकमत रहेको पनि जिकिर गरे ।
‘पाकिस्तान अधिनस्थ कश्मिर पीओके बारे हामीले एक संसदीय प्रस्ताव गरेका छौँ, जसमा भारतका सबै पार्टी यसमा प्रतिबद्ध छन् । पाकिस्तान अधिनस्थ कश्मिर भारतको हो, यो हामीलाई फिर्ता हुनु पर्छ’, उनले अगाडि भनेका छन् ।
उनले पीओके भारत फिर्ता गराउने कुरालाई राष्ट्रका लागि आफूहरूको प्रतिबद्धताको संज्ञा दिए ।
एस जयशंकरले धारा ३७० हटाएसँगै अब कश्मिर र सारा भारतका मानिसहरूले पाकिस्तान अधिनश्थ कश्मिर पनि फिर्ता लिनुपर्ने सोच्न थालेको बताए ।
‘हामीले ३७० बारे सही निर्णय लिएका थियौँ । पीओके अब भारतीयको दिमाग आउन थालेको छ । कुनै पनि कुरा प्राप्तिका लागि सबैभन्दा पहिले मानिसको दिमागमा त्यो कुरा आउनु जरुरी हुन्छ ’, उनले अन्तिममा भने ।
