काठमाडौं– जनता समाजवादी पार्टी (जसपा)नेपालको केन्द्रीय समिति बैठक आज बस्दैछ । बैठक बिहान ११ बजे ज्यापु प्रज्ञा भवन च्यासलमा बस्ने प्रवक्ता मनिष सुमनले जानकारी दिए ।
बैठकले पार्टीको फुट, समसामयिक राजनीति, महाधिवेशन तयारीलगायत विषयमा छलफल गरी आवश्यक निर्णय लिने जनाइएको छ ।अशोक राईको नेतृत्वमा सात जना संघीय सांसद अलगिएपछि जसपा नेपालको राजनीतिक परिवेश फेरिएको छ । यसको असर प्रदेश हुँदै केन्द्रमा समेत आइपुगेको छ ।
मधेस प्रदेशमा जसपा नेपालका सरोज यादव नेतृत्वको सरकारबाट आईतबार माओवादी केन्द्र र एमाले बाहिरिए पछि पार्टी अध्यक्ष तथा उपप्रधान एवं स्वास्थ्यमन्त्री उपेन्द्र यादवलाई केन्द्रीय सरकार छाड्नु पर्ने नैतिक बाध्यता आइपरेको छ ।
यो परिस्थितिमा संघीय सरकारमा रहने वा नरहने भन्ने विषयमा आजको बैठकले औपचारि निर्णय गर्ने प्रवक्ता सुमनले बताए । यद्यपि आइतबार बसेको जसपा नेपालको केन्द्रीय कार्यकारिणी समितिको बैठकले सरकारबाट बाहिरिनुका साथै समर्थन फिर्ता लिने निर्णय गरिसकेकाे छ । उपप्रधानमन्त्री यादवलाई प्रधानमन्त्री पुष्पकमल दाहाल प्रचण्डले नै राजीनामा दिन दिइसकेकाे बुझिएको छ ।
नेकपा एमालेका अध्यक्ष केपी शर्मा ओली र प्रचण्डले पार्टी जसपा नेपाल फुटाइदिएको यादवको जिकिर छ । उनले सार्वजनिक कार्यक्रमहरुमै एमाले र माओवादीले पार्टी विभाजनमा भूमिका खेलेको आरोप लगाउँदै आएका छन् ।
