काठमाडौं– प्रतिपक्षी राष्ट्रिय प्रजातन्त्र पार्टी (राप्रपा) ले केन्द्रीय सदस्य ठाकुरमोहन श्रेष्ठमाथि हातपात गर्नेहरुलाई उन्मुक्ति दिएको छ ।
राप्रपाको जारी केन्द्रीय समिति बैठकले चार वर्षका लागि निलम्बन गरिएका तीन जनालाई सोमबार उन्मुक्ति दिएको हो ।
गत फागुन २७ गते राप्रपा केन्द्रीय कार्यालयमा केन्द्रीय कार्यसम्पादन समिति बैठक चलिरहँदा केन्द्रीय सदस्य श्रेष्ठमाथि कुटपिट भएको थियो ।
उक्त घटनामा संलग्न पार्टीका सहायक महामन्त्री प्रेम बलायर, काठमाडौं क्षेत्र नं. ४ का क्षेत्रीय अध्यक्ष रिद्धीप्रताप राणा र राष्ट्रिय प्रजातान्त्रिक युवा संगठनका सदस्य सचिव निराजन बमलाई गरिएको निलम्बन फुकुवा गरिएको प्रवक्ता मोकनकुमार श्रेष्ठले बताए ।
‘ठाकुरमोहन श्रेष्ठसहित पार्टीको शीर्ष नेतृत्व सामु उहाँहरुले आत्मआलोचना गर्दै माफी मागेपछि कारबाही फुकुवा गरिएको हो,’ उनले भने ।
राप्रपाको जारी केन्द्रीय समिति बैठकको पहिलो दिन उनीहरूको निलम्बन फुकुवा गर्नुपर्ने माग उठेको थियो । पार्टी अध्यक्ष राजेन्द्र लिङदेनले आफ्नो राजनीतिक प्रतिवेदन वाचन गर्दै गर्दा दुई महामन्त्रीसहित ८–९ जना केन्द्रीय सदस्य उठेर सांकेतिक विरोध जनाएका थिए । विरोध जनाउने महामन्त्रीमा डा. धवलशम्शेर राणा र कुन्ती शाही रहेको स्रोतले जानकारी दियो ।
स्रोतका अनुसार हातपात गर्ने तीनैजनाले शीर्ष नेताको उपस्थितिमा ठाकुरमोहनसँग माफी मागेका छन् । त्यसपछि आजको बैठकमा ठाकुरमोहनले आफूमाथि हातपात गर्नेहरूलाई माफी दिएको घोषणा गरेको स्रोतले बतायो ।
यसैबीच राप्रपाका प्रमुख सचेतक ज्ञानेन्द्र शाही भने नेतामाथि कुटपिट गर्नेमागि गरिएको कारबाही फुकुवाप्रति असन्तुष्ट बनेका छन् । उनी जारी केन्द्रीय समिति बैठक छोडेर हिँडेका छन् । स्रोतका अनुसार ठाकुरमोहनलाई महामन्त्री विक्रम पाण्डेले दबाबमा राखेर माफी दिन लगाएको आशंकामा शाहीले बैठक छाडेका हुन् ।
