विराटनगर– नेकपा एमाले कोशी प्रदेश संसदीय दलको उप नेतामा तिलकुमार मेन्याङ्बो चयन भएका छन् ।
एमाले कोशी प्रदेश संसदीय दलका नेता तथा कोशी प्रदेश सरकारका मुख्यमन्त्री हिक्मत कुमार कार्कीको अध्यक्षतामा बसेको दलको बैठकले दलको उप नेतामा मेन्याङ्बोलाई उप नेता चयन गरेको हो ।
यस अघि राम राना दलको नेकपा एमाले कोशी प्रदेश संसदीय दलका उप नेता थिए। राना आर्थिक मामिला तथा योजना मन्त्रीमा नियुक्त भएपछि संसदीय दलको उप नेताको जिम्मेवारी मेन्याङ्बोलाई दिएको नेकपा एमाले संसदीय दलका सचेतक कमला दर्नालले बताए ।
राना २०८० वैशाख २० गते एमाले कोशी प्रदेश संसदीय दलको उप नेतामा चयन भएका थिए । दलको उप नेतामा चयन भएका मेन्याङ्बो नेकपा एमाले पोलिटब्युरो सदस्य हुन्। उनी ताप्लेजुङबाट प्रदेश सभा सदस्यमा निर्वाचित भएका हुन् ।यस्तै बैठकले कोशी प्रदेश सरकारले आगामी आर्थिक वर्षका लागि प्रदेश सभामा ल्याउन लागेको नीति तथा कार्यक्रमका विषयमा सुझाव दिन ५ सदस्यीय कार्यदल बनाएको छ । संसदीय दलको बैठकले उप नेता तिलकुमार मेन्याङ्बोको संयोजकत्वमा ५ सदस्यीय कार्यदल बनाएको हो ।
कार्यदलमा सचेतक कमला दर्नाल, प्रदेश सभा सदस्य तिलचन पाठक, इन्द्रमणि पराजुली र जयप्रकाश चौधरी सदस्य रहेका छन् । कार्यदलले आगामी आर्थिक वर्षका लागि सरकारले प्रदेश सभामा पेस गर्ने बजेट नीति तथा कार्यक्रम कस्तो बनाउने भनेर सुझाव दिने छ ।
कार्यदलले १८ गते सम्ममा सुझाव दिइसक्ने सचेतक कमला दर्नालले बताए ।
