बैंकक । थाइल्यान्डका पूर्व प्रधानमन्त्री थाक्सिन सिनावात्रा विरुद्ध अभियोग लगाइने भएको छ ।

राजसंस्थाको अपमान गरेको भन्दै ७४ वर्षका सिनावात्रामाथि अभियोग चलाउन लागिएको त्यहाँका महान्यायाधीवक्ताले बताएका हुन् । सिनावात्रा १५ वर्ष निर्वासनमा बसेर गएको वर्ष मात्रै स्वदेश फर्किएका थिए । नौ वर्ष अघि एक कोरियाली पत्रिकालाई दिएको अन्तरवार्ताका लागि उनीमाथि अभियोग लगाउन थालिएको हो ।

राजसंस्थाको अपमान गर्न नपाइने कानून मिचेको भन्दै अभियोग लगाउन थालिएको उनी अहिलेसम्मकै सर्वाधिक हाई–प्रोफाइल राजनीतिज्ञ हुन् । राजनीतिक विरोधीहरूलाई तह लगाउन थाइल्यान्डले व्यापक रुपमा यो कानूनको प्रयोग गर्दै आएको छ । गएको चार वर्षमा मात्रै सयौं मानिसमाथि यो अभियोग लगाइएको छ । सिनावात्रा गत वर्ष मात्रै आफ्नो परिवार र कट्टरपन्थी समूहबीचको शुत्रता अन्त्य गर्न स्वदेश फर्किएका थिए ।

यसबीच राजनीतिक विरोधीसँग मिलेर उनको दलले गठबन्धन सरकार बनाएको थियो । सन् २०१५ मा कोरियाली पत्रिकालाई दिएको अन्तरवार्तामा सिनावात्राले राजाको शीर्ष सल्लाहकारी समितिलाई सन् २०१४ मा सैन्य कूलाई सघाएको अनि आफ्नो बहिनी यिङलकको नेतृत्वको सरकार ढलाएको आरोप लगाएका थिए । यिङलक सन् २०११ को आम निर्वाचनबाट प्रधानमन्त्री चुनिएकी थिइन् ।