काठमाडौं । सत्ताको नेतृत्वको गरिरहेको दल नेकपा (माओवादी केन्द्र)का सांसद महिन्द्र राय यादवले प्रत्येक खेतमा सिँचाइको व्यवस्था बजेटमा गर्न सक्नुपर्ने बताएका छन् । कृषिप्रधान देशमा किसान भोकै भएको उनले उल्लेख गरे । उनले सबै सांसदले आफ्नो निर्वाचन क्षेत्रमा १० बिघा क्षेत्रमा सामूहिक खेतीमा प्राथमिकता दिनुपर्ने बताए ।
सोमबारको प्रतिनिधिसभा बैठकमा आर्थिक वर्ष २०८१/०८२ को राजस्व र व्ययको वार्षिक अनुमान (बजेट)माथिको सामान्य छलफलका क्रममा उनले ऊर्जा क्षेत्रमा आत्मनिर्भर हुने गरी बजेट ल्याइएको बताए । १० वर्षमा पाँच लाखजनालाई प्रत्यक्ष रोजगारी दिने विषयले जनतामा उत्साह थपेको उनको भनाइ थियो ।
बजेटले सुशासन, सामाजिक न्याय र समृद्धिको आधार कोरेको भन्दै उनले नेपाली जनताको जीवनशैलीमा आमूल परिवर्तन ल्याउने विश्वास आफूलाई भएको बताए । उनले संघीय लोकतान्त्रिक गणतन्त्रप्रति नेपाली जनतामा भएको आशंकालाई बजेटले निरूपण र दिशानिर्देश गरेको पनि जिकिर गरे ।
जनताको तीव्र विकासको आकांक्षा पूरा गर्ने गरी ल्याइएको बजेट समाजवादउन्मुख भएको उनले बताए । उनले बजेट उत्कृष्ट भएको भन्दै नेपाली जनताको विश्वास र भरोसा कायम गर्ने उल्लेख गरे ।
