काठमाडौं । नेकपा (एमाले)का सांसद अच्युतप्रसाद मैनालीले मधेस प्रदेशमा हत्याका घटनाहरू बढेको भन्दै नियन्त्रणका लागि सरकारको ध्यानाकर्षण गराएका छन् ।
आइतबारको प्रतिनिधिसभा बैठकमा बोल्दै उनले यस्तो बताएका हुन् । उनले मधेस प्रदेशका विभिन्न जिल्लाहरूमा दिनदहाडै हत्याका श्रृंखलाहरू बढ्दै गएको भन्दै सरकारले आवश्यक ध्यान दिनुपर्ने बताए ।
भारतबाट खुला सीमाका कारण नेपालमा आएर हत्या गर्ने, सुटरहरू नेपाल प्रवेश गर्ने र हत्या गर्ने हुनाले हत्याका घटनामा उल्लेख्य वृद्धि भएको भन्दै रोकथामका लागि आवश्यक पहल गर्न आग्रह गरे । अपराधीलाई अविलम्व नियन्त्रण गरी कानुनको दायरामा ल्याउन आवश्यक रहेको उनको भनाइ छ ।
उनले भने, “बारा जिल्लामा यो चौथो घटना हो । एक वर्षको अवधिमा गत असोजमा पनि कलैया सदरमुकामको चोकमा दिन दहाडै एक निजी स्कुलका प्रिन्सिपलमाथि आक्रमण भयो । उहाँको हत्या भयो । भदौ महिनामा पनि भारतका व्यक्तिलाई नेपालमा ल्याएर हत्या गरियो । यो हत्याको श्रृंखला बढ्दै गइरहेको छ । दुर्भाग्यको कुरा सुटर भारतबाट आएर नेपालमा आउने, खुला सीमा, हातहतियारहरुको ओसारपसारले गर्दा मधेस खासगरी सीमा क्षेत्रका बासिन्दा असुरक्षित र त्रसित भएका छन् ।”
उनले सीमापारीको प्रशासनसँग समन्वय गरेर प्रशासनले सक्रियता अपनाउन आवश्यक रहेको बताए ।
