दुग्ध विकास संस्थान (डिडिसी)मा २ वर्षसम्म महाप्रबन्धकको जिम्मेवारीमा रहँदा विवाद नै विवादले घेरिएका सञ्जिब झा फेरी महाप्रबन्धक बन्ने कसरतमा छन् । २ वर्षे कार्यकालभरी डिडिसीमा अनियमित्ता, दुध तस्करी, भ्रष्टाचार लगायतको आरोप खेपेका सञ्जिब दोस्रो पटक महाप्रबन्धक बन्नका लागि शक्ति केन्द्रको दौडधुपमा लागेका हुन् ।

गत चैत १२ गते कार्यकाल सकेका सञ्जिबलाई शैक्षिक योग्यता सम्बन्धी प्रश्न उठेको थियो । अहिले उनी विरुद्ध अदालत, अख्तियार र प्रहरीको केन्द्रीय अनुसन्धान ब्यूरोमा उजुरी परेको छ । महाप्रबन्धकमा नियुक्ति लिँदा अस्तित्वमा नै नभएको संस्थाको कीर्ते अनुभव पेश भएको दाबीसहित सर्वोच्चमा अदालतमा रिट समेत परेको छ । यस अघि १७ करोड रकम अपचलन गरेको आरोप समेत उनलाई लागेको थियो ।

यतिबेला उनलाई मन्त्रालयले जिम्मेवारमुक्त समेत बनाएको थियो । तर, अदालतबाट अन्तरिम आदेश लिएर उनी डिडिसीमा फर्किएका थिए । उनले कृषकहरुको भुक्तानी नगरी भारतबाट गैरकानुनी रुपमा दुध लिएर काठमाडौं भित्राएको आरोप समेत लागेको छ । यस्ता विवादित व्यक्ति सञ्जिब डिडिसीको महाप्रबन्धक बन्नका लागि भरसक प्रयास गरिरहेका छन् । यसका लागि उनले कृषी तथा पशुपन्छी मन्त्रालय धाईरहेका छन् । स्रोतका अनुसार सञ्जिब झा समेत गरी तीन जनाको नाम मन्त्रालयले सर्ट लिस्टमा छनोट गरिसकेको छ । यस्ता आरोप नै आरोपबाट घेरिएका व्यक्ति पुनः डिडिसीको जिम्मेवारीमा आएभने बचेखुसेको अस्तित्व समेत अझै गुम्ने अभियान्ताहरु बताउँछन् ।

दुग्धजन्य पदार्थको संकलन र बिक्री वितरण गर्ने सरकारको पूर्ण स्वामित्वमा रहेको दुग्ध विकास संस्थान (डिडिसी) अनियमित्ता र बेथितिले थिलोथिलो बन्दै गएको छ । विगत लामो समयदेखि निरन्तर आरालो यात्रातर्फ लागिरहेको डिडिसीको जिम्मेवारीमा सञ्जिब आएपछि यसको गति अझ बढेको हो । डिडिसीले एक अर्ब ३२ करोड रुपैयाँ भुक्तानी दिन बाँकी छ । संस्थानको घाटा ४२ करोडभन्दा बढी छ ।

स्रोत साधन र अधिकार सम्पन्न भएपनि संस्थानको जिम्मेवारी शक्तिकेन्द्रले ईच्छाएको व्यक्तिले पाउँने हुँदा यस्ता सार्वजनिक संस्थान धरासायी बन्दै गएको छ । जसको ज्वलन्त उदाहरण बनेका छन्, सञ्जिब झा । झामाथि संस्थानको महाप्रबन्धक रहँदा दुग्ध किसानको नागरिकता जम्मा गरी आफ्नो कीर्ते दस्तखत गरि बैंक खाता खोलेर रकम जम्मा गर्न लगाउने गरेको आरोप समेत छ । झाले दुग्ध संकलन केन्द्रहरूका कर्मचारीहरूलाई प्रभावमा पारी दूधको गुणस्तर छैन, कम फ्याट छ, दूधको मात्रा कम छ, मिसावट छ भनेर किसानलाई थोरै मूल्य दिई ठगेको आरोप खेप्दै आएका थिए ।

महालेखा परीक्षकको प्रतिवेदनले संस्थानमा करिब ८२ करोड बेरुजु देखाएको छ। झालाई सञ्चालक सदस्य राजेन्द्र प्रसाद यादव समेतको साथ सहयोग देखिन्छ । यस्तो विवाद नै विवादले घेरिएका व्यक्ति सञ्जिब पुन डिडिसीमा नै जाने कसरत गरिरहँदा शक्तिकेन्द्र भने मौन छ । बरु उनैलाई जिम्मेवारी दिएर डिडिसीमा पठाउन शक्ति केन्द्र तम्तयार रहेको बुझ्नमा आएको छ ।