काठमाडौं । जापान पेरिस ओलम्पिक–२०२४ को पदक तालिकाको शीर्ष स्थानमा उक्लिएको छ । शनिबारदेखि सुरु भएको प्रतियोगिताको तेस्रो दिनका खेल जारी रहँदा जापान चार स्वर्णसहित पदक तालिकाको शीर्ष स्थानमा उक्लिएको हो । जापानले दुई रजत र एक कास्यसहित कुल सात पदक जितेको छ ।

जापानलाई पछ्याइरहेको अस्ट्रेलियाले पनि चार स्वर्ण नै जितेको छ । अस्ट्रेलियाले थप दुई रजतसहित कुल ६ पदक जितेको छ । तेस्रो स्थानको अमेरिकाले तीन स्वर्ण, ६ रजत र तीन कास्यसहित १२ पदक जितेको छ ।

यस्तै, चौथो स्थानको फ्रान्सले पनि तीन स्वर्ण, तीन रजत र दुई कास्यसहित आठ पदक जितेको छ । पाँचौँ स्थानको कोरियाले तीन स्वर्ण, दुई रजत र एक कास्यसहित ६ पदक जितेको छ । तालिकाको छैटौँ स्थानमा चीन छ । चीनले तीन स्वर्ण जित्दा एक रजत र दुई कास्य जितेको छ ।

प्रतियोगिताको तेस्रो दिन चलिरहँदा कुल १२ देशले स्वर्ण जितेका छन् । २० टिमले रजत र २८ देशले कास्य जितेका छन् । दक्षिण एसियाली राष्ट्रबाट भारतले एक कास्य जितेको छ । पेरिस ओलम्पिकमा २०६ राष्ट्रका करिब १० हजार ५०० खेलाडीले ३२९ स्पर्धामा प्रतिस्पर्धा गरिरहेका छन् ।