काठमाडौं । रेस्टुरेन्ट व्यवसायी मनोज बानियाँमाथि खुँडा प्रहार गर्ने समूहका तीनजना आरोपी पुर्पक्षका लागि थुनामा पुगेका छन् । जिल्ला अदालत ललितपुरले पक्राउ परेका ६ मध्ये तीनजनालाई सोमबार पुर्पक्षका लागि थुनामा पठाउने आदेश गरेको हो ।

जिल्ला अदालतले भैँसेपाटीका ‘बाबा’ भनिने राजेश केसी, धरानका विभाग गुरुङ र धनकुटाका दिपक वान्तवा राईलाई पुर्पक्षका लागि थुनामा पठाउने आदेश गरेको हो । उनीहरूसँगै पक्राउ परेका जावलाखेलका सुरेन्द्र महर्जन र आलिंकन लामिछानेसँग भने अदालतले तीन÷तीन लाख रुपैयाँ धरौटी लिएर छोडेको छ ।

पक्राउ परेका अर्का आरोपी आयुमान अधिकारीलाई भने प्रहरीले प्रतिवादी बनाए पनि जिल्ला सरकारी वकिल कार्यालय ललितपुरले मुद्दा चलाउनु नपर्ने भन्दै कार्यालयबाटै छाडेको हो ।

स्नोप भण्डारीसहित दुईजना भने अझै फरार छन् । चुनिखेलामा बानियाँको निर्माणाधीन रिसोर्टमा गत असार ७ गते ज्यानमार्ने उद्देश्यले उनीमाथि खुँडा प्रहार गरिएको थियो । खुँडा प्रहारबाट बानियाँ घाइते भएका थिए । नख्खुस्थित मेडिसिटी अस्पतालमा उपचारपछि उनी ‘डिस्चार्ज’ भएका थिए । उनको बायाँ हात र खुट्टा तथा तिघ्रामा गहिरो चोट लागेको थियो । पक्राउ परेकामाथि प्रहरीले ज्यान मार्ने उद्योगमा मुद्दा चलाएको थियो । राजेश केसीको योजनामा बाँनियामाथि गुरुङ र राईले खुँडा प्रहार गरेका थिए ।